Tarazda sý salasyna arnalǵan halyqaralyq oqý ortalyǵy ashylýy múmkin
ASTANA. KAZINFORM — Qazaqstan men Qytaı sý salasyna maman daıarlaıtyn birlesken kolledj ashý máselesin pysyqtap jatyr.
Sý resýrstary jáne ırrıgatsııa mınıstri Nurjan Nurjigitov Qytaı Halyq Respýblıkasynan kelgen delegatsııamen kezdesti. Delegatsııany «Úsh shatqal» elektr energetıkasy kásiptik kolledjiniń rektory Chen Mın bastap keldi. Kezdesýde taraptar sý salasyna kadr daıarlaý jáne olardyń biliktiligin arttyrý baǵytyndaǵy ekijaqty yntymaqtastyqty damytý máselelerin talqylady.
Kezdesýde Taraz qalasynda Qazaq sý sharýashylyǵy ǵylymı-zertteý ınstıtýtynyń bazasynda birlesken oqý ortalyǵyn, sondaı-aq Qazaq ulttyq sý sharýashylyǵy jáne ırrıgatsııa ýnıversıtetiniń bazasynda bilikti mamandardy daıarlaýdyń tolyq tsıklin qamtamasyz etetin birlesken oqý kolledjin ashý máselesi qaraldy. Sondaı-aq Qytaıdan oqytýshylardy tartý máselesi talqylandy.
Sonymen qatar taraptar qazaqstandyq sý salasy mamandarynyń QHR-da biliktiligin arttyrý baǵdarlamasyn ázirleý múmkindigin talqylady. Kezdesý qorytyndysy boıynsha Sý resýrstary jáne ırrıgatsııa mınıstrligi men «Úsh shatqal» elektr energetıkasy kásiptik kolledji barlyq birlesken bastamany jan-jaqty pysyqtaý úshin arnaıy jumys tobyn qurýǵa kelisti.
— «Úsh shatqal» kolledji Qytaıdyń sý salasyna kadr daıarlaý baǵytyndaǵy jetekshi oqý oryndarynyń biri ekenin eskersek, bul baǵyttaǵy yntymaqtastyqtyń áleýeti óte joǵary dep sanaımyz. Taraz qalasynda birlesken oqý ortalyǵy men oqý kolledjin ashý jónindegi jobalar kadr daıarlaý júıesine tyń serpin beredi dep senemin. Bul akademııalyq almasýdy, biliktilikti arttyrý baǵdarlamalaryn, ǵylymı taǵylymdamalardy jáne qazaqstandyq mamandardy oqytýdy jańa deńgeıge kóterýge múmkindik beredi, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik bıyl qaı mamandyqtarǵa grant kóp bólingeni týraly jazǵan edik.
