Tarazda smart-tehnologııalar shyǵaratyn zaýyt salynady
TARAZ. KAZINFORM –QHR ınvestorlary Taraz qalasynda sý resýrstary men ırrıgatsııa júıelerin basqarýǵa arnalǵan smart-tehnologııalar shyǵaratyn zaýyt ashady. Sý resýrstary jáne ırrıgatsııa mınıstrligi men qytaılyq kompanııalar konsortsıýmy yntymaqtastyq týraly memorandýmǵa qol qoıdy.
Mınıstrlik málimetinshe, qujatqa Sý resýrstary jáne ırrıgatsııa mınıstri Nurjan Nurjigitov pen Yellow River Engineering Consulting Co. Ltd kompanııasynyń dırektory – bas ekonomısi In Deven qol qoıdy. Sheteldik delegatsııa quramynda Leture Technology jáne Cheng Cheng Group kompanııalarynyń basshylary da boldy.
Kásiporyn tsıfrlyq sheshimder óndirýge mamandanady. Atap aıtqanda, sý resýrstaryn bólýdi avtomatty túrde baqylaý jáne basqarý júıeleri, sý deńgeıi men sapasyn ólsheıtin datchıkter, ırrıgatsııa jelilerin dıspetcherleýge arnalǵan baǵdarlamalyq-apparattyq keshender, sondaı-aq sý tasqyny men tótenshe jaǵdaılardy erte eskertý júıeleri shyǵarylady. Zaýyttyń iske qosylýy Qytaıda qoldanylatyn ozyq tehnologııalardy jergilikti jaǵdaıǵa beıimdeýge, bilim men tájirıbe transferin qamtamasyz etýge jáne Qazaqstannyń sý sharýashylyǵy salasyna zamanaýı standarttardy engizýge múmkindik beredi.
Kásiporyn «óndiris – bilim – ǵylym» qaǵıdaty boıynsha jumys isteıtin ıntegratsııalanǵan ortalyqtyń bir bóligi bolady dep josparlanyp otyr. Munda jabdyq óndirýmen qatar, mamandar daıarlaý, kadrlardyń biliktiligin arttyrý jáne tsıfrlyq sheshimderdi elimizdiń klımattyq jáne gıdrologııalyq jaǵdaıyna beıimdeý jumystary júrgiziledi.
Jobany júzege asyrý ırrıgatsııa júıeleriniń tıimdiligin arttyrýǵa, sý shyǵynyn azaıtýǵa jáne Qazaqstannyń sý qaýipsizdigin nyǵaıtýǵa yqpal etedi.
- Biz birneshe baǵyt boıynsha birlesip jumys isteýge kelistik. Eń aldymen, avtomattandyrý men tsıfrlandyrýdy mindetti túrde engize otyryp, ırrıgatsııa júıelerin rekonstrýktsııalaý. Ekinshisi - kadr daıarlaý. Sońǵy eki jylda biz qytaılyq kásiporyndarmen belsendi yntymaqtastyq ornattyq. Mysaly, bıyl Power China kompanııasynyń esebinen sý sharýashylyǵy salasyndaǵy 125 maman Qytaıda biliktiligin arttyrý kýrstarynan ótti, - dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin Óskemende maı óndiretin jańa zaýyt ashylǵanyn jazǵan bolatynbyz.