Tarazda sot sheshimimen 15 nysannyń jumysy toqtatyldy
Cot sheshimimen Taraz qalasynda 15 nysan óz qyzmetin toqtatqan, olar – «Salvador», «Mfachion», «GQ», «Koala» kafesi, «Marko Polo» kafesi, «Tropkana» kafesi, «Disco-80-90» kafesi, «Toy duman» meıramhanasy, «Gaýgartas» meıramhanasy, «Golden Hall» meıramhanasy, «Park Palace» kafesi, «Samýraı» oıyn klýby, «Sevınch» meıramhanasy.
Bul týraly búgin ÓKQ alańynda Jambyl oblysy sanıtarııalyq-epıdemıologııalyq baqylaý departamenti basshysynyń orynbasary Baǵlan Qydyrbaev aıtyp berdi.
Epıdemıologııalyq jaǵdaı matrıtsasyna sáıkes, oblys qyzyl aımaqta. Aýrýhanalardyń tósek-orynmen qamtylýs 63%. Búgingi tańda 2 259 naýqas aýrýhanada emdelip jatyr.
1 tamyzǵa deıingi jaǵdaı boıynsha Jambyl oblysynda koronavırýs ınfektsııasyna qatysty 9 630 jaǵdaı tirkelgen, sońǵy táýlikte aýrýdyń 135 jańa jaǵdaıy anyqtalǵan
Aýrýdyń joǵary deńgeıi oblystyń barlyq qala men aýdandarynda baıqalady.
«Aýrýdy juqtyrýdyń negizgi yqtımal oryndary, ol otbasy músheleriniń bazar, saýda obektilerine barýy, qoǵamdyq kólikti jıi paıdalaný jáne otbasylyq is-sharalar. Jambyl oblysynda karantın kezeńinde jumys isteıtin nysandardyń sanıtarlyq-epıdemııaǵa qarsy rejımdi saqtaýyn baqylaý úshin 38 monıtorıng toby qurylǵan», - dedi Baǵlan Qydyrbaev.
Spıkerdiń aıtýynsha, monıtorıng toptarynyń quramyna jergilikti atqarýshy organdardyń, «Atameken» kásipkerler palatasynyń óńirdegi fılıaly men quqyq qorǵaý organdarynyń ókilderi kiredi.
Jyl basynan beri monıtorıng toptarynyń músheleri karantın talaptardy buzǵan 836 nysandy anyqtap, olardyń basshylyǵyna túsindirý jumysyn júrgizip, eskertý bergen.
«Tekserý materıaldary men monıtorıng toptarynyń sanıtarlyq-epıdemıologııalyq qyzmetke bergen materıaldar negizinde 835 mıllıon teńgeden astam somaǵa 705 aıyppul salyndy. Sonymen qatar, búgingi kúnge deıin Jambyl oblysynda 71 kásipkerlik obektilerinde karantın sharasyn qasaqana buzý faktileri anyqtaldy. Tekserý nátıjesi boıynsha jalpy somasy 59 mıllıon teńgeden asatyn aıyppul salýmen 262 tulǵa ákimshilik jaýapkershilikke tartyldy», - B. Qydyrbaev.
