Tarazda sońǵy kúnderi avtobýstar sırek júre bastady
Qoǵamdyq kólik - Taraz qalasy turǵyndary úshin ózekti ári jıi talqyǵa túsetin taqyryptardyń biri bolyp otyr. Áleýmettik jelide qalalyqtardan avtobýs marshrýttaryna qatysty kóp shaǵym túsýde. Ásirese, olar mereke kúnderi qoǵamdyq kólik qozǵalysynyń aıtarlyqtaı qysqartylǵanyn jetkizgen. Osy máselege aıryqsha kóńil bólgen Jambyl oblysynyń ákimi Berdibek Saparbaev avtobýs parkterin aralap, olardyń jumysymen tanysty.
Naqtyraq aıtsaq, aımaq basshysy aldymen oblys ortalyǵyndaǵy marshrýttardyń 40 paıyzyna qyzmet kórsetetin «ÁýlıeAtaTransPass» JShS-de boldy. Kún saıyn seriktestikke tıesili 162 avtobýs 17 baǵyt boıynsha qatynaıdy. Munda jyl saıyn jańa tehnıkalar qatary tolyǵyp, GPS júıesi engizilgen desek te, turǵyndardyń kórsetilip otyrǵan qyzmet sapasyna kóńili tolmaıdy.
- Sońǵy birneshe kún ishinde azamattardan shaǵymdar kóp túsýde. Avtobýstardyń óte sırek júrgeni mereke kúnderi turǵyndarǵa aıtarlyqtaı qıyndyq týǵyzǵan. Avtoparkter Taraz qalasy ákimdigimen jasalǵan shartqa qol qoıǵan. Ol sizderdi qoǵamdyq kólikti taza ustaýǵa, tasymal kestesin jáne halyqpen qarym-qatynas jasaý mádenıetin barynsha saqtaýǵa mindetteıdi. Búgingi tańda avtobýs parkiniń barlyq pýnktileri boıynsha narazylyq bar, - dedi Berdibek Saparbaev.
Oblys ákimi qala ákimdigine avtopark basshylyǵymen birlese kezdesip otyrǵan máselelerdi sheshýdi tapsyrdy. Sondaı-aq, aımaq basshysy bul sekildi keleńsizdikter qaıtalanatyn bolsa, tasymaldaýshy kompanııalarǵa eń qatań sharalar qabyldanatynyn atap ótti. Ol kezde eskertýmen shektelmeıdi.
«Áýlıeatranspass» JShS dırektory Rashıd Pirmanovtyń ujymmen túsindirý jumystary júrgizilgendigin jetkizip, bul kúnderi kiris jospary bekitilmeıtinine sendirdi. Alaıda, júrgizýshiler alynǵan túsim tipti janar jaǵarmaı shyǵyndaryna da jetpeıtinin aıtyp shaǵymdanýda. Osyǵan uqsas kórinis «SaparTrans 2012» JShS-nde de kezdesedi.
Tasymaldaýshylar endi qoǵamdyq kólik qozǵalysyn jolǵa qoıý jáne júrý kestesin buzbaýǵa ýáde berdi. Olardyń aıtýynsha, avtobýstardyń tozýy ótkir máselege aınalǵan. Nashar joldardyń saldarynan qoldaǵy bar tehnıkalar tez jaramsyz kúıge túsýde. Qala ákimi Aıtqazy Qarabalaev oblys ortalyǵynyń kóshelerin jóndeý jumystary kóp uzamaı bastalatynyn tilge tıek etti.
- Taǵy bir ózekti másele - kásibı júrgizýshilerdiń jetispeýshiligi bolyp otyr. Bizge jumys isteýge kóp adamdar kele bermeıdi, - deıdi «SaparTrans 2012» JShS dırektory Baýyrjan Ádilov.
Tasymaldaýshy-kompanııalar óz jumysynyń sapasyn jaqsartý úshin jergilikti bılikten tarıfti kóterýdi nemese sýbsıdııalaý arqyly qol ushyn berýdi surap otyr.
- Tarıfti kóterý máselesi muqııat qaraýdy talap etedi. Sebebi ol qala turǵyndary úshin, ásirese áleýmettik jaǵynan osal toptaǵy azamattar úshin ońaı soqpasy anyq. Meniń oıymsha, qyzmet kórsetý sapasyn arttyrýǵa qol jetkizbeı turyp, tarıfti arttyrǵan durys emes. Onyń ústine mynadaı qıyn ýaqytta oǵan jiti mán berý kerek, - dep jaýap berdi Berdibek Saparbaev.
Sondaı-aq, avtobýs parkterin aralaý barysynda Berdibek Saparbaev qalalyq avtobýstardy dezınfektsııalaý sharalary qalaı júrgizilip jatqanyn tekserdi. Tarazda koronavırýspen kúresý úshin sanıtarlyq jumystarmen aınalysatyn tórt kompanııa bar. Bul rette qoǵamdyq kólik pen aıaldamalar kúnine eki ret dezınfektsııalanýda.
