Tarazda sońǵy qońyraý sharasy erekshe formatta ótti
TARAZ. QazAqparat – Tarazda erekshe formatta «Sońǵy qońyraý - 2020» merekelik is-sharasy ótti, dep habarlaıdy QazAqparat.
Oblys ortalyǵyndaǵy «Jastar alleıasynda» ótken sońǵy qońyraý barysynda 6 avtokólik Uly aqyn Abaı Qunanbaev beınelengen baıraqty jelbiretip, 6 baǵyt boıynsha Taraz qalasyn júrip ótti.
Kólikte pándik olımpıadalar, túrli shyǵarmashylyq halyqaralyq, respýblıkalyq baıqaýlardyń jeńimpazdary, «Jas ulan» uıymynyń belsendi kóshbasshylary, respýblıkalyq «Jas patrıottar» akademııasynyń músheleri otyrdy.
Balalar aqynnyń poezııasyn, óleńderin, qara sózderinen úzindiler oqyp, ánderin oryndady. Budan bólek kólikterde daýys kúsheıtkish arqyly «Sońǵy qońyraý» merekesine arnalǵan quttyqtaýlar, bilim salasynyń jetistikteri aıtyldy.
Sondaı-aq, bul kúni ár synypta barlyq oqýshynyń qatysýymen onlaın sońǵy qońyraý jáne synyp saǵattary ótkizildi. Oblys ákimi B.Saparbaev jergilikti telearnadan oqýshylardy oqý jylynyń aıaqtalýymen jáne túlekterdi mektep bitirý imen quttyqtady.
Aıta keteıik, bıylǵy jyly Jambyl oblysy boıynsha mektep bitirgeli otyrǵan 9 171 túlektiń 78,3 paıyzy (7 181 oqýshy) UBT-ǵa qatysý úshin onlaın ótinish tapsyrǵan. Onyń ishinde 383 túlek - «Altyn belgige» jáne 366 túlek - úzdik attestatqa úmitker.
«11-synyp túlekterine attestat tapsyrý jáne sońǵy qońyraý 3-4 maýsymda ótedi. Mektep bitirý keshterinde sanıtarlyq talaptar men qaýipsizdik normalary saqtalýy qajet. Іs-shara mektep aýmaǵynda, ashyq alańda ár synyp úshin bólek ótkiziledi, ýaqyt aralyǵy - 20 mınýt. Árbir túlekpen 1 ne 2 ata-anasy qatysa alady. Oqýshylar maskamen qamtamasyz etilip, qashyqtyqty saqtaýy kerek. Oqýshylardan mektep nemese pedagogterge syılyq jasaý úshin qarajat jınaý, avtokólikterdi jalǵa alyp, qala ishinde ekskýrsııa jasaý jáne meıramhana, dámhana, kóńil kóterý oryndarynda otyrys uıymdastyrýǵa tyıym salynady»,-deıdi oblystyq bilim basqarmasy basshysynyń mindetin atqarýshy Jámıla Bekbatyrova.
