Tarazda shetel azamatynan asa iri kólemde sıntetıkalyq esirtki tárkilendi
ASTANA. KAZINFORM — Tarazda er adamnan asa iri kólemdegi sıntetıkalyq esirtki tárkilendi, dep habarlaıdy Polisia.kz.
Jambyl oblysy polıtsııa qyzmetkerleri jedel-izdestirý is-sharalaryn júrgizý barysynda 29 jastaǵy shetel azamatyn ustady. Jeke tintý kezinde odan aq tústi untaq tárizdi zat salynǵan, oqshaýlaǵysh taspamen oralǵan 10 túıinshek tabylyp, tárkilendi. Sonymen qatar jaqyn mańdaǵy edennen dál osyndaı taǵy 18 túıinshek anyqtaldy.
Kúdiktiniń ýaqytsha turyp jatqan mekenjaıynda júrgizilgen keıingi tintý barysynda polıtsııa qyzmetkerleri ózine tán ıisi bar aq tústi untaq zat salynǵan taǵy 109 túıinshekti tárkiledi.
Sot saraptamasynyń qorytyndysyna sáıkes, tárkilengen zat «Alfa-PVP» sıntetıkalyq esirtkisi bolyp tanyldy. Tárkilengen esirtkiniń jalpy salmaǵy 59,01 gramdy qurady. Aldyn ala baǵalaý boıynsha onyń qara naryqtaǵy quny 2,7 mıllıon teńgeden asady.
Atalǵan derek boıynsha QR qylmystyq kodeksiniń 297-babynyń 3-bóligimen sotqa deıingi tergep-tekserý bastaldy. Kúdikti ýaqytsha ustaý ızolıatoryna qamaldy.
Aldyn ala málimetterge sáıkes, er adam zańsyz tabys tabý týraly usynysty Telegram messendjeri arqyly alǵan. Ol esirtkini taratý úshin aldyn ala daıyndalǵan túıinshekterdi Almaty qalasynan alyp, olardy Taraz qalasynyń aýmaǵynda ótkizýdi josparlaǵan. Alaıda onyń zańsyz áreketiniń joly polıtsııa qyzmetkerleriniń jedel jumysynyń nátıjesinde der kezinde kesildi.
Aıta keteıik, Mańǵystaý oblysynda asa iri kólemdegi esirtkini jetkizý arnasy joıyldy.
