Tarazda Shavkat Rahmonovtyń zaıybyna qatysty sot qaraýy bastaldy

TARAZ. KAZINFORM — Aıyptaýshy tarap áıeldi jol-kólik oqıǵasynda eki adamnyń mert bolýyna kináli dep sanaıdy, dep habarlaıdy Kazinform tilshisi. 

Tarazda Gúlaıym Rahmonovanyń qatysýymen adamdar ólimine ákep soqtyrǵan jol-kólik oqıǵasy isi boıynsha sot qaraýy bastaldy. Otyrys barysynda prokýror aıyptaýdy jarııalap, apat bolǵan kúni sottalýshynyń ápkesi, uly jáne dosymen jolda kele jatqanyn habarlady. Aıyptaý tarapynyń málimetinshe, ol kólikti túni boıy júrgizip, qatty sharshaǵanyna qaramastan rýldi basqa júrgizýshige bermegen.

Eske salsaq, bıyl 27 shildede saǵat 08:50–de «Almaty-Ekaterınbýrg» respýblıkalyq mańyzy bar avtojolynyń 299 shaqyrymynda jol-kólik oqıǵasy boldy. 

Almatyǵa bara jatqan «Toyota Land Cruiser 200» markaly kóliginiń júrgizýshisi rýldi basqara almaı, kólik aýdarylǵan. Jol-kólik oqıǵasynan eki adam qaıtys boldy. Sonymen qatar, osy jol apatynan keıin Shavkat Rahmonovtyń zaıyby men uly aýrýhanaǵa jetkizilip, dárigerlerdiń baqylaýynda boldy.

Bastapqyda Shavkat Rahmonovtyń zaıyby Gúlaıym Rahmonova tergeý materıaldarynda qorǵaný quqyǵy bar kýáger retinde kórsetilgen. Alaıda keıin áıel sottalýshylar qatarynda boldy.

2025 jyldyń qarashasynda Rahmonovtyń zaıyby tizgindegen kólik apatyna qatysty tergeý aıaqtalýǵa jaqyndaǵanyn jazdyq.