Tarazda «Sergek» kameralary ornatylyp jatyr
TARAZ. QazAqparat – Jambyl oblysynda qaýipsiz jol qozǵalysyn uıymdastyrýǵa baǵyttalǵan zamanaýı tehnıkalyq quraldar ornatylyp jatyr, dep habarlaıdy QazAqparat tilshisi.
«Jyl basynan beri oblysta 707 jol-kólik oqıǵasy tirkeldi, sonyń saldarynan 133 adam qaza taýyp, taǵy 1063 adam túrli jaraqattar alǵan. 175 jol-kólik oqıǵasy respýblıkalyq mańyzy bar joldarda, 102-si – jergilikti joldarda, 430-y – eldi mekender kóshelerinde oryn alǵan», - dep baıandady Jambyl oblysy ákimdiginiń Jolaýshylar tasymaly jáne avtomobıl joldary basqarmasynyń basshysy Baqytjan Jánibekov.
«Óńir kúre joldarynda apat qaýpi bar 22 aımaq anyqtalǵan. Alaıda jol-kólik oqıǵalarynyń negizgi sebebi – júrgizýshilerdiń jol qozǵalysy erejelerin saqtamaýy. Apattarǵa kóbine jyldamdyqty asyrý, manevr jasaý, joldyń qarsy jolaǵyna shyǵý sebep bolyp otyr», - dep atap ótti B.Jánibekov.
Aımaqtyq kommýnıkatsııa qyzmetinen atap ótkendeı, óńirde jol ınfraqurylymyn jaqsartý úshin quzyretti organdarmen birlesip qaýipsiz jol qozǵalysyn uıymdastyrý boıynsha zamanaýı tehnıkalyq quraldardy engizý jospary quryldy. Bul – respýblıkalyq mańyzy bar joldarda shýyl jolaqtaryn salý, jolaýshylar ótkelderinde jaryqtandyrý modýlderin, kólik quraldarynyń burylys oryndarynda, ótpejoldarda jol býferlerin, joldyń bólingen alaptarynda jaryqdıodty katafottar men jaryq shaǵylystyrýshy quraldar ornatý, apat qaýpi bar ýchaskelerde shetelde qoldanylatyn jaryq shamshyraqtaryn ilý.
«Bıyl Tarazda quqyq buzýshylyqtyń aldyn alý maqsatynda memlekettik-jekemenshik seriktestik aıasynda «Sergek» kesheniniń beınebaqylaý kameralary ornatylady. Joba aıasynda 450 nysanda qoǵamdyq tártipti baqylaıtyn 1250 kamera, jol qozǵalysyn qadaǵalaıtyn 48 kamera ornatý qarastyrylǵan. Іlki jobaǵa sáıkes, búginde qaladaǵy áýejaıdan Tuńǵysh Prezıdent saıabaǵyna deıingi on nysanda kameralar ornatylǵan. Bul sharalardy 2022 jyldyń birinshi toqsanynda aıaqtaý josparlanyp otyr», - dep aqparattandyrdy spıker.
B. Jánibekov kúre joldardy saqtap qalý jáne olarda aýyr júk tasıtyn kólikterdiń baqylaýsyz qozǵalysyn boldyrmaý úshin arnaıy qadaǵalaý sharalary uıymdastyrylyp, tekserý reıdteri ótkizilip júrgenin atap ótti. Bıylǵy jyldyń basynan beri reıd barysynda aýyr júk tasıtyn 4 608 kólik quraly tekserilgen. 943 ákimshilik hattama toltyrylyp, 23,2 mln teńge aıyppul salynǵan, dep atap ótti spıker.
