Tarazda segiz eldiń kardıohırýrgtary bas qosty
TARAZ. QazAqparat - Tarazda Qazaqstan, Reseı, Ýkraına, Ózbekstan, Qyrǵyzstan, Túrikmenstan, Germanııa jáne Aýstrııa kardıohırýrgtary qatysqan halyqaralyq ǵylymı-tájirıbelik konferentsııasy ótti, dep habarlaıdy QazAqparat.
Konferentsııanyń saltanatty ashylý rásimine Jambyl oblysy ákiminiń orynbasary Erkebulan Daýylbaev, Taraz qalasynyń ákimi Qaırat Dosaev jáne Qazaqstan Respýblıkasy Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Asqar Horoshash jáne ózge de qurmetti qonaqtar qatysty.
Úsh kúnge sozylǵan sharada sheteldik mamandar kúrdeli operatsııalar arqyly ózderiniń tájirıbelik isterimen bólisti. Aıtalyq, birinshi kún kishkentaı tilik jasaý arqyly tamyrlardyń zaqymdanýy kezinde mıokardty revaskýlıarızatsııalaý otasy sátti ótti. Bul sheberlik saǵatyn Ýkraınanyń Kıev qalasyndaǵy Dobrobýt klınıkasynyń professory Aleksandr Bablıak bastaǵan kardıohırýrgter brıgadasy ótkizdi. Al kelesi kúni «Júrekshe aralyq qalqanyń aqaýyn torakoskopııalyq jabý» operatsııasyn Tarazdyq Kardıohırýrgııa jáne transplantologııa ǵylymı-klınıkalyq ortalyǵynyń kardıohırýrgy Ikromjon Mýhamedov bastaǵan bir top dáriger jasap shyqty. Sondaı-aq, úshinshi kúni 3D formatyndaǵy mıtraldi aqaýlardy torakoskopııalyq túzetý operatsııasyn professor Lıýdvıg Mıýller (Insbýrk q., Avstrııa) júrgizdi.
«Konferentsııa taqyryby - «Fast Track - Cardiosurgery» kezdeısoq tańdalmaǵan. Kóp jyldyq tájirıbe kórsetkendeı, ota jasalǵan naýqastyń aǵzasy strestik reaktsııalarǵa ushyraıdy. Sondyqtan anestezııadan keıingi oıaný, qaıta qalypqa kelý óte kóp ýaqytty alady. Fast Track tujyrymdamasy hırýrgııalyq aralasýdan keıin aǵzany tezirek qalpyna keltirýge baǵyttalǵan. Fast Track - Cardiosurgery jańa baǵyty búginde ýaqyt talaby bolyp tabylady»,- dedi Asqar Horoshash.
Sondaı-aq, óz sózinde Erkebulan Daýylbaev óńirlik medıtsınanyń, sonyń ishinde kardıologııalyq qyzmettiń jetistikterin atap ótti. Olar oblys turǵyndaryna joǵary mamandandyrylǵan kardıologııa, kardıohırýrgııa jáne ınterventsııalyq kardıologııa aıasynda derti asqynǵan naýqastarǵa hırýrgııalyq aralasýlar jasap, múmkindiginshe turǵyndardyń ómir jasyn uzartýǵa, ólim, múgedektik kórsetkishterine jol bermeý jolynda ter tógip kele jatqan «Ǵylymı-klınıkalyq kardıohırýrgııa jáne transplantologııa ortalyǵynyń» bul baǵytta atqaryp otyrǵan qyzmetine aıryqsha qurmet kórsetti.
