Tarazda saıajaıdyń 4 turǵyny qoǵamdyq orynda esirtki paıdalanǵan
TARAZ. QazAqparat - Taraz qalasyndaǵy 27 saıajaı alqabyna qylmystyń aldyn alý jáne jolyn kesý maqsatynda úsh kúndik tekserý júrgizilip, nátıjesinde 100-den asa ákimshilik zań buzý faktileri anyqtaldy, dep habarlaıdy QazAqparat tilshisi.
Tekserýge qalalyq polıtsııa basqarmasynyń jeke quramynan 110 qyzmetker jumyldyrylyp, 40 jaıaý patrýl baǵyty jáne 7 avtopatrýl beketi quryldy. Olar Shóldala, Qumshaǵal, Qyzylabad, Kóltoǵan kentterinde jáne Kazarma razezinde ornalasqan 27 saıajaı alqabyn tekserdi. Aıta keteıik, onda 20300 adam turady.
«Jumys barysynda 23 shetel azamatynyń kóshi-qon zańnamasyn saqtaýyna qatysty tekserý júrgizildi. Olardyń tarapynan zań buzý faktileri anyqtalǵan joq. 350 búkteme taratylyp, 103 ákimshilik quqyqbuzýshylyq anyqtaldy. Oblystyq narkodıspanserge 14 azamat jetkizildi. Únemi spırttik ishimdik ishetin bes turǵyn anyqtaldy», -deıdi oblystyq polıtsııa departamenti baspasóz qyzmetiniń jetekshisi Gúlsara Muqtarqulova.
Úsh kún ishinde QR QK 296-baby 1-bóligi boıynsha alty qylmystyq is tirkelgen.
«22 aqpan kúni Taraz qalalyq polıtsııa qyzmetkerleri Qumshaǵal aýylynyń «Vodnık» saıajaı alabynda qoǵamdyq orynda esirtki paıdalanǵan 30 jastaǵy azamatty ustady. Kelesi kúni, 23 aqpanda Shóldala aýylynyń «Pobeda» saıajaıynda taǵy osyndaı qylmyspen úsh azamat qolǵa tústi», - delingen vedomstvonyń habarlamasynda.
