Tarazda saıabaqqa sýretter jaıyldy
TARAZ. KAZINFORM — Tarazda erekshe kórme ótti. Ereksheligi sol, ónersúıer qaýym kartınany qabyrǵaǵa ilingen emes, saıabaqta jerge jaıylǵan qalpynda tamashalady.
Týyndylary búginde elimizge ǵana emes, alys-jaqyn shet memleketterge de tanys bolǵan Altynbek Qartabaı 25 jyldan beri Jambyl oblystyq «Araı» jastar gazetinde fototilshi.
«Altynbektiń foto álemi» taqyrybynda uıymdastyrylǵan óner aıaldamasyna negizinen fototilshi túsirgen sulý peızajdary, portrettik obrazdar qoıyldy.
Halyqaralyq, respýblıkalyq baıqaýlardyń júldegeri, kásibı fotograftyń týyndylaryn tamashalaýǵa anasy Altyngúl Solaǵaıqyzy, týǵan-týys, dos-jarandarymen qatar, oblystaǵy mádenıet, óner salasynyń ókilderi keldi.
«Altynbektiń fotolarynan aldymen ádemilikti, sulýlyqty kóremiz. Ol árqashan izdeniste júretindiginiń, eńbekqorlyǵynyń arqasynda biraz bıik belesterdi baǵyndyryp, myqty mamandardan joǵary baǵasyn alǵan kásibı fotograf. Uıymdastyrǵan árbir kórmesi de jańa formatta, ózgesheligimen erekshelenip turady», — deıdi áriptesi, fototilshi Aqádil Rysmahan.
Qala ortalyǵyndaǵy Qaırat Rysqulbekov saıabaǵynda ótken kórmege bas-aıaǵy 80-ge jýyq týyndy qoıyldy.
Ashyq aspan astynda, kók shóptiń ústinde jaıylǵan fotolar áýezdi áýenmen árlenip, kelýshilerge erekshe kóńil-kúı syılady.
«Bul ıdeıany men álemdik deńgeıdegi fototilshiniń kórmesinen kórdim. Ol fotosyn jerge aq mataǵa jaıyp tastaǵan bolatyn. Sodan men ony ary qaraı jandandyryp, damyta tústim. Az-kem kemshilikter boldy, ókinishke qaraı. Tamashalaýshylar kórme bir kún emes, birneshe kúnge jalǵasqanda jaqsy bolar edi degen oılaryn aıtyp jatty», — deıdi Altynbek Qartabaı.
Buǵan deıin Tarazda turatyn qoqystan «podezd» sándeıtin qarııa jaıynda jazǵan bolatynbyz.
