Tarazda sarbazdyń áskerı bólimnen qashyp ketýine ne sebep boldy
TARAZ. QazAqparat – «Ońtústik» aımaqtyq komandovanıesinen sarbazdyń áskerı bólimnen qashyp ketýine ne sebep bolǵanyn túsindirdi, dep habarlaıdy QazAqparat.
Eske sala ketsek, «Ońtústik» aımaqtyq komandovanıesi mehanıkıkalandyrylǵan brıgadasynyń áskerı qyzmetkeri,19 jastaǵy Nurasyl Arysbaev túngi kezekshilik kezinde eshkimge eskertpesten áskerı bólimnen ketip qalǵan.
Onyń áskerı qyzmetiniń aıaqtalýyna jarty jyl ýaqyt qalǵan edi.
Jigittiń týystary onyń qashyp ketkenine sengen joq, sebebi sodan bir kún buryn úıine telefon shalǵan ol jaǵdaıynyń jaqsy ekenin aıtqan.
Sarbaz tórt kúnnen keıin tabyldy. Ony izdeý jumystaryna búkil Jambyl oblysy boıynsha 19 izdeý toby, sonyń ishinde quqyq qorǵaý organdary, Taraz garnızonynyń áskerı polıtsııasy jumyldyrylǵan.
Jigittiń áskerı bólimnen qashyp ketýine ne sebep bolǵany jaıynda QazAqparat tilshisine QR Qorǵanys mınıstrligine qarasty Dına Muharınova baıandap berdi.
«Sarbaz úıin saǵynyp, barǵysy kelgenin, biraq sonyń aldynda aqsha tapqysy kelgenin aıtyp otyr. Bólimdegi qyzmetkerler arasyndaǵy qatynas jarǵydan tys shyqqan joq. Bul - naǵyz úlgi eterlik áskerı bólim. Ár bólimshesinde tárbıeshi ofıtserler, psıhologtar bar. Barlyq jerde beınebaqylaý kamerasy ornatylǵan. Álimjettik joq. Ózim sonda úsh jyl boıy qyzmet atqaryp, ondaǵy sarbazdarǵa óz balalarynan kem qaramaıtynyn aıta alamyn», - dedi ol.
