Tarazda salmaǵy 5 keli alyp bala dúnıege keldi

TARAZ. QazAqparat - Taraz qalasynyń perınataldyq ortalyǵynda salmaǵy bes kılogramm sábı dúnıege keldi, dep habarlaıdy QazAqparat tilshisi.

Densaýlyq saqtaý basqarmasy baspasóz qyzmetiniń málimetinshe, 19 sáýirde Jambyl oblystyq kópbeıindi aýrýhanasynyń perınataldy ortalyǵyna júkti áıel túsken.

«Áıel qatty tolǵatyp keldi. Dárigerler ony qarap shyqqan soń birden konsılıým shaqyrdy, óıtkeni bul - erekshe jaǵdaı edi, - deıdi basqarmanyń baspasóz qyzmeti. – Shaqalaqtyń iriligimen qosa basqa da problema boldy - náreste basymen emes, bóksesimen kelip turǵan bolatyn. Sondyqtan qalaı bosandyrý máselesin shuǵyl sheshý kerek boldy».

Mamandardyń aıtýynsha, jambaspen kelgen balany ádette tabıǵı jolmen dúnıege ákelýge tolyq múmkindik bar, ondaı derekter az emes.

Alaıda dál osy jaǵdaıda náresteniń iri bolýy, sondaı-aq ananyń metabolıkalyq sındromy oǵan kedergi jasady. Sondyqtan shuǵyl túrde kesir tiligin jasaý jóninde sheshim qabyldandy.

Otany klınıkanyń uıymdastyrý-ádisteme bóliminiń basshysy Baǵdat Nurmahan jáne qabyldaý bóliminiń meńgerýshisi Aqmaral Toqbergenova jasady.

Operatsııa sátti ótti, salmaǵy bes keli jáne boıy 62 santımetr bolatyn qyz dúnıege keldi.

«Ana men balanyń jaǵdaıy jaqsy, úıge shyǵýǵa daıyndalyp jatyr. Salmaǵy bes keliden asatyn nárestelerdi alyp bala dep ataıdy. Óıtkeni sábı 5-6 keli salmaqqa ádette alty aıǵa tolǵanda jetedi. Taraz perınataldy ortalyǵynda iri bala sońǵy márte 2017 jyly dúnıege kelgen. Sol joly 30 jastaǵy Alena Premýshko atty kelinshek 6 kılogramm 265 gramm jáne boıy 67 santımetr bolatyn «rekordshy « qyzdy bosandy. Bul - onyń úshinshi balasy edi, náreste aıy-kúnine tolyq jetip tabıǵı jolmen ómir esigin ashty», - deıdi oblystyq densaýlyq saqtaý basqarmasynyń bastyǵy Áset Qalıev.

Dárigerlerdiń aıtýynsha, sońǵy onjyldyqtarda jedel bıologııalyq damý júrip jatyr, sondyqtan náresteler jıi bes jáne alty kılogramm bolyp týady.