Tarazda prokýror shelpekke qaqalyp, qaıtys boldy

TARAZ. KAZINFORM – Taraz qalasy Prokýratýra bóliminiń aǵa prokýrory Sergeı Nalygachev dúnıeden ozdy. Boljam boıynsha, ol jergilikti dámhanalardyń birinde shelpekke qaqalyp, artynsha tunshyǵyp ólgen. Bul týraly CMN.KZ jazdy. 

Qaıǵyly oqıǵa 2024 jylǵy 30 maýsymda bolǵan. Prokýror qaıtys bolǵan dámhananyń ákimshisi oqıǵanyń mán-jaıyn aıtyp berdi.

«Nalygachev kafege dosymen birge keldi. Olar tapsyrys bergen. Daıashy aldymen tek shelpek ákelip úlgergen. Marqumnyń dosy onyń tunshyǵyp ólgenin aıtty. Al jedel járdem dárigerleri kelgende er adamnyń kim ekenin anyqtap, bir-eki kún buryn ınsýltpen aýrýhanaǵa jatyp, shyqqanyn aıtty. Em almaı, aýrýhanadan shyǵyp ketkeni aıtyldy», — deıdi dámhana ákimshileriniń biri.

Sondaı-aq ákimshi prokýrorǵa dosy alǵashqy medıtsınalyq kómek kórsete almaǵandyqtan, óldi degen boljam aıtty. 15 mınýttan keıin jetken jedel járdem qyzmetkerleri marqumnyń óli ekenin rastaǵan. 

Jambyl oblysy prokýratýrasy baspasóz qyzmetiniń málimetinshe, Sergeı Nalygachev 20 jyldan astam prokýratýrada túrli laýazymdarda qyzmet etken. Ol naǵyz óz isiniń mamany bolǵan. Óte meıirban, janashyr jaqsy adam bolǵan. 

«Ol ujym arasynda úlken qurmetke ıe boldy», — dedi vedomstvodan.

Jambyl oblysynyń prokýratýrasy otbasy men jaqyndaryna kóńil aıtyp, marqum prokýrordyń otbasyna moraldy jáne materıaldy qoldaý kórsetýge ýáde berdi.