Tarazda polıtsııa ınspektory ıis tıip, es-tússiz jatqan bir úıdiń 5 adamyn qutqaryp qaldy
Oqıǵa 6 naýryz kúni saǵat 22:00 shamasynda boldy.
Taraz qalasy PB 2-shi polıtsııa bóliminiń kámeletke tolmaǵandar jónindegi ýchaskelik polıtsııa ınspektory Álisher Ermekovtyń aıtýynsha, ol mektep dırektorynyń tárbıe jónindegi orynbasary Elmıra Eselbaevamen birge oqýshynyń sabaqqa kelmeý sebebin bilý úshin onyń úıine kelgen.
Mektepke kelmegen 8 jasar balanyń ata-anasy qońyraýlarǵa jaýap bermegen. Mekenjaıǵa kelgen polıtsııa ınspektory qaqpany qaqqanda da ony eshkim ashpaǵan. Kórshilerden suraǵannan keıin, kesheden beri otbasyn eshkim kórmegeni belgili boldy.
Álisher Ermekov kórshisiniń ruqsatymen úıdiń aýlasyna kirgen.
– Úıge kele jatyp, terezeden biz balanyń edende es-tússiz jatqanyn kórdik. Oılanbastan terezeni syndyryp, bólmege kirdim. Úıde kaýstıkalyq ıis boldy, men turǵyndardyń kómirtegi totyǵynan ýlanǵanyn túsindim. Birden gazdy jaýyp, barlyq terezelerdi ashtym, – dedi Álisher Ermekov.
Barlyq bólmelerdi aralap shyqqan polıtsııa qyzmetkeri 58 jastaǵy otaǵasyn, onyń 47 jastaǵy áıelin, olardyń 12 jáne 10 jastaǵy qyzdaryn, sondaı-aq 8 jasar ulyn kóshege shyǵardy.
Polıtseı zardap shekkenderge dárigerge deıingi qajetti kómek kórsetip, keıin jedel medıtsınalyq járdem qyzmetkerlerine tapsyrdy. Otbasy dereý aýrýhanaǵa jatqyzyldy.
Dárigerlerdiń aıtýynsha, eger olarǵa kómek sál keshikkende, eshkimdi qutqarý múmkin bolmas edi.
Qazirgi ýaqytta polıtsııa qyzmetkeriniń jáne mektep dırektory orynbasarynyń úılesimdi jáne jedel is-qımyldarynyń, nemquraıly qaramaǵandyǵynyń arqasynda otbasynyń barlyq músheleriniń ómiri men densaýlyǵyna qaýip tónip turǵan joq.