Tarazda polıtseıler keıýana qatigezdikpen óltirilgen qylmystyń izin sýytpaı ashty
TARAZ. QazAqparat – Tarazda polıtseıler 80 jastaǵy keıýanany óltirý deregin jyldam ashty, dep habarlaıdy QazAqparat tilshisi Jambyl oblysy polıtsııa departamentiniń baspasóz qyzmetine silteme jasap.
Vedomstvonyń málimetine súıensek, 26 tamyz kúni 11:45-te Taraz qalasynyń Jedel basqarma ortalyǵyna Ýezdnaıa kóshesi, №2 úıdiń aldyndaǵy sý arnasynda áıel adamnyń denesi jatqany týraly habar kelip tústi. Jedel izdestirý sharalary kezinde ol Tarazdyń 80 jastaǵy turǵynynyń máıiti ekendigi anyqtaldy.
«Polıtseıler qylmysty jarty saǵattyń ishinde ashty. Anyqtalýynsha, birneshe jyl buryn kempirdiń uly qaıtys bolyp, ony jerleýge kelgen dosy artynsha kempirdiń úıinde qalady. Uzaq ýaqyt birge turady. Bir kúni ekeýi sózge kelip qalady. 57 jastaǵy er adam araqqa toıyp alyp, kempirdi ólgenshe sabaǵan. Qylmysyn jasyrý úshin kempirdiń denesin qapqa salyp, arnadaǵy sýǵa batyryp jibergen», - dep málimdedi, polıtsııa departamenti.
Kúdikti qylmysyn moıyndaǵan, ol qazir Tarazdaǵy tergeý ızolıatorynda otyr. Tıisti saraptamalar belgilendi.
QR Qylmystyq kodeksiniń 99-baby («Adam óltirý»), 1-bóligimen sotqa deıingi tergep-tekserý bastaldy.
Avtor: Galına Skrıpnık
