Tarazda perzenthana 200 oryndyq ınfektsııalyq aýrýhana bolyp qaıta jasaqtalýda
TARAZ. QazAqparat – Jambyl oblysynyń ákimi Berdibek Saparbaev Taraz qalasyndaǵy birqatar nysandardy aralap, ondaǵy jóndeý jumystarymen tanysty, dep habarlaıdy QazAqparat tilshisi.
Aldymen aımaq basshysy shahardaǵy demalys oryndarynyń biri Arbatqa at basyn tiredi. 3 bólikten turatyn demalys ornyndaǵy qurylys jumystary áli júrýde. Jobalaýshylardyń ıdeıasy boıynsha «Arbat» jaıaý júrginshiler joly «Kóne Taraz» kesheni men Qarahan baba kesenesin baılanystyrmaq. Onda jalpy aýdany 2,5 gektardy quraıtyn uzyndyǵy 320 metrlik sazdy sýburqaq iske qosylady. Júrgizilip jatqan jumystarǵa oń baǵasyn bergen Berdibek Saparbaev bul jermen ótetin jaıaý júrginshilerdiń qaýipsizdigin oılastyrýdy tapsyrdy. Óıtkeni eki jerden kesip ótetin kólik joly apat týdyrýy múmkin.
Nysanǵa birge kelgen Taraz ákiminiń orynbasary Ashat Esenálıev kólikteriń jolyn basqa jaqqa burý múmkin emestigin jetkizdi. Óıtkeni osy mańaıdaǵy aýlalarǵa aparatyn basqa ótkel joq. Arbat ishin eki jerden sý arnasy da kesip ótedi. Biraq olardyń qazirgi jaǵdaıy oblys ákiminiń kóńilinen shyqpady. Osy jermen serýendep júretin turǵyndar qoqys tastap ábden kórkin qashyryp tastaǵan.
Kezindegi perınataldyq ortalyq ornynda ınfektsııalyq aýrýhana jumysyn bastaýy tıis. Onda qazir qaıta jabdyqtaý jumystary qarqyndy júrýde. Jospar boıynsha 3 bloktan turatyn nysan 200 tósek orynǵa shaqtalǵan. Tamyz aıynyń basynda bastalǵan jumystardyń negizgi bóligi aıaqtalǵan. Merdigerlerdiń aıtýynsha, árleý, ishki jalǵaý jumystary ǵana qalyp tur.
Bloktardy ózi aralap shyqqan Berdibek Saparbaev ishki bólmelerdi josparlaǵanda sanıtarlyq talaptardy umytpaý kerektigin eskertti. Emdelýshilerge jaıly jaǵdaı jasalýy kerektigine mán berdi.
«Mundaǵy jylý júıelerin tolyqtaı aýystyramyz. Burynǵy shoıyn batareıalardyń ornyna plastık, bımetaldy materıaldardan jasalǵan júıe bolady. 40 adam jumys istep jatyr. Kafel tóseýshiler jetispeıdi. Qazir 7 adam osymen aınalysady. Negizi 15 jumysshy bolsa, jumys tezirek júrýshi edi»,- deıdi «Talas-Qurylys» JShS-niń ýchaske basshysy Samat Aqataev.
«Qandaı másele bolmasyn, 1 qazanǵa deıin aýrýhana daıyn bolýy kerek!» dep tapsyrdy Berdibek Saparbaev.
Merdiger mekeme ókilderi esh kedergi bolmasa, belgilengen merzimnen buryn jumystardy aıaqtaýǵa nıetti ekenin bildirdi.
