Tarazda pedagogtardyń ınnovatsııalyq ıdeıalaryna arnalǵan baıqaý ótti
Pedagog mamandardyń ınnovatsııalyq oqytý tehnologııalaryn arttyryp, ózara tájirıbe almasý maqsatynda uıymdastyrylǵan sharaǵa óńirdiń 250-ge jýyq muǵalimi qatysty.
«Bilim men ǵylymǵa qoıylar talap artyp, oqý júıesi kúrdelengen shaqta jańa qoǵamnyń muǵalimine júkteler mindet te eselene túsýde. Ustazdar qaýymy aldynda bilim berý ǵana emes, órkenıet kóshine jol bastaıtyn, básekege qabiletti, ultjandy azamat tárbıeleý isi tur. Memleket basshysy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna arnaǵan bıylǵy Joldaýynda bilim berý júıesiniń rólin ózgertý, IT-bilimdi, bilikti pedagogtardyń jetispeý problemasyn aıtyp, osy rette naqty usynystar berýdi tapsyrǵan bolatyn. Atalǵan festıvaldiń alǵa qoıǵan maqsaty da osy. Zamanaýı tehnologııalardy, ınnovatsııalyq úderisterdi jete meńgergen maman daıyndaýǵa úles qosý», - dedi TarMPI rektory Darııa Qojamjarova jıynnyń ashylý rásiminde.
Baıqaýda ótken jyldyń 15 jeltoqsanynan bıylǵy jyldyń 15 qańtaryna deıin ótkizilgen «Vırtýaldy saıystyń» qorytyndysy jarııalandy. Ár nomınatsııa boıynsha úzdik dep tanylǵan bilikti pedagogtar arnaıy sertıfıkattarǵa ıe bolyp, dıplomdarmen marapattaldy.
Aıta keteıik, saıystyń «Úzdik mýltımedıalyq prezentatsııa» jáne «Úzdik flıpchart» atalymdaryna jalpy sany 118 avtorlyq ınnovatsııalyq ónim kelip túsken. Bul kórsetkish ótken jylmen salystyrǵanda úsh esege joǵary. Pedagogtar óz jobalarynda búgingi bilim berý júıesiniń talabyna sáıkes ozyq veb-tehnologııa, robototehnıka, ǵylymı joba, psıhologııalyq trenıng, stantsııaly oqytý jáne aǵylshyn tilindegi ıntegratıvti oqytý baǵyttaryna basymdyq bergen.
Sonymen qatar, baıqaý aıasynda pedagogıkalyq zertteýdiń qorytyndysy jáne aqparatty bilim berý resýrstary jaıynda trenıngter júrgizildi. Trenerlerdiń basym bóligi Germanııa, Ispanııa, Anglııa, Sıngapýr, Ońtústik Koreıa, AQSh syndy memleketterde biliktiligin arttyrǵan tájirıbeli mamandar.
