Tarazda páter órtinen 12 adam qutqaryldy
TARAZ. QazAqparat – Taraz qalasynda páterdegi órt joıylyp, 12 adam qutqaryldy, - dep habarlaıdy QazAqparat tilshisi.
Jambyl oblysy TJD Órt sóndirý mekemesiniń Kúshter men quraldardy jedel basqarý ortalyǵynyń «101» telefon nómirine Taraz qalasy, Astana shaǵyn aýdanynyń kópqabatty turǵynúı páterleriniń birinde órt tutanǵany jóninde habarlama kelip túsken.
Oqıǵa ornyna Taraz qalasy №1 mamandandyrylǵan órt sóndirý bóliminiń 2 órt sóndirý avtokóligi men 1 avtosatysy jáne kezekshilik órt sóndirý qyzmeti, sonymen qatar jedel-qutqarý jasaǵynan 1 avtokólik, barlyǵy 16 adam jetken. Bul týraly oblystyq TJD baspasóz qyzmeti habarlady.
«Órt sóndirýshi-qutqarýshylar shuǵyl túrde júrgizgen barlaý nátıjesinde órt bolǵan páterdiń jýynatyn bólmesi men dárethanasynyń órtke oranǵany anyqtalǵan. Oqıǵa ornynda gaz-tútinnen qorǵaý qyzmetiniń eki toby qurylyp, qoıý tútin jaıylǵan podezd arqyly ishke kirip, órt sóndirý jumysyn júrgizgen. Sondaı-aq ózge ot jaýyngerleri avtosaty kómegimen joǵarǵy qabattardan 6 eresek adam men 6 balany qutqarǵan. Órttiń odan ári jaıylýyna jol berilmedi»,-delingen vedomstvo habarlamasynda.
Tilsiz jaý dereý aýyzdyqtalyp, tolyqtaı joıylǵan. Órttiń aýdany 20 sharshy metrdi quraǵan.
Jalynnan zardap shekkender joq. Qazirgi ýaqytta órttiń shyǵý sebebi men keltirilgen materıaldyq shyǵyny anyqtalýda.
Osyǵan oraı Jambyl oblysy TJ departamenti Taraz qalasy men oblys turǵyndaryn órt qaýipsizdigi erejelerin qatań saqtaýǵa shaqyrady.
