Tarazda páter kezegindegi 90 otbasy baspanaly boldy

TARAZ. QazAqparat – Tarazda Memlekettik rámizder kúni aıasynda páter kezeginde uzaq jyldar boıy turǵan 90 adamǵa «Nurly jer» turǵyn úı baǵdarlamasy boıynsha salynǵan páter kiltteri tabystaldy, dep habarlaıdy QazAqparat oblys ákimdiginiń resmı saıtyna silteme jasap.

Páterler jetim balalar, múgedekter, tolyq emes jáne az qamtamasyz etilgen otbasylar, sonymen qatar áleýmettik jaǵynan halyqtyń osal tobyndaǵy basqa da sanattarǵa jatatyn azamattarǵa berildi. 5 qabatty eki turǵyn úı Araı-2 shaǵynaýdanynda ornalasqan.

Jambyl oblysynyń ákimi Berdibek Saparbaev turǵyndardy qonys toıymen quttyqtady.

- Bizdiń elde qoljetimdi baspana máselesin sheshýge aıryqsha kóńil bólinýde. Ótken jyly «Nurly jer» baǵdarlamasy boıynsha 2 myńnan astam tarazdyq jańa qonys toıyn toılasa, bıyl oblys ortalyǵyn 50-den astam kóp páterli turǵyn úı salý josparlanǵan. Memleket basshysynyń tapsyrmasymen ázirlengen jańa «5-10-20» baǵdarlamasy da myńdaǵan otbasylarǵa baspana alýǵa múmkindik bermek. Memlekettik rámizder kúnimen qatar kelgen qonys toılaryńyz qutty bolsyn! Shańyraqtaryńyz shattyqqa toly bolyp, bereke-birligimiz arta bersin, - dedi oblys ákimi.

Bul kúni qonys toıyn toılaǵandardyń qatarynda Aýǵan soǵysynyń ardageri Berik Torǵaıbekovtiń otbasysy da bar. Ol uzaq jyl boıy páter jaldap turǵanyn aıtyp, memlekettik qoldaý arqyly baspanaly bolǵandyǵyn aǵynan jaryla jetkizdi.

Aıta keteıik, aǵymdaǵy jyly Taraz qalasynda 54 kóppáterli turǵyn úıdiń qurylysy júrýde. Osylaısha, 3025 otbasyn jeke baspanamen qamtamasyz etý josparlanyp otyr. Onyń ishinde áleýmettik az qamtylǵan jáne kóp balaly otbasylar sanatyndaǵy 1100 otbasy bar.

Búgingi tańda Taraz qalasy boıynsha 18,6 myń adam turǵyn úı kezeginde tirkelgen.