Tarazda pandemııa saldarynan qoǵamdyq kólik qyzmeti 46 paıyzǵa qysqarǵan
TARAZ. QazAqparat – Pandemııa saldarynan Taraz qalasyndaǵy qoǵamdyq kólikterdiń qyzmeti 46 paıyzǵa kemigen,- dep habarlaıdy QazAqparat tilshisi.
Búgingi tańda Tarazda 230 avtobýs tek 29 baǵyt boıynsha kúndelikti qyzmet kórsetedi. Al, buǵan deıingi turaqty kezeńde 42 baǵyt boıynsha 425 avtobýs jolaýshylardy tasymaldaýmen aınalysyp kelgen.
Bul týraly búgin óńirlik kommýnıkatsııalar qyzmeti aqparat alańynda Jambyl oblysy jolaýshylar kóligi jáne avtomobıl joldary basqarmasynyń basshysy Baqytjan Jánibekov aıtty.
Sala basshysynyń sózinshe, karantın kesirinen qaladaǵy 10 tasymaldaýshy mekeme qarjylaı qıyndyq kórip otyr. Sondyqtan búginde jergilikti bıýdjetten tasymaldaýshylarǵa sýbsıdııa berý sharasy qarastyrylyp jatqanyn aıtty.
«Pandemııa bastalǵaly oqý oryndary men balabaqsha qyzmetkerleri, stýdentter men oqýshylar qashyqtan oqytýǵa kóshkeni belgili. Sonyń saldarynan qalada jolaýshylar aǵymy 2-esege deıin tómendegen. Al avtobýs sany azaıǵandyqtan keshki reısterdi oryndamaý derekteri tirkelip otyr»,-dedi B.Jánibekov.
Sondaı-aq, basqarma basshysy bıyl 28 qyrkúıekten bastap engizilgen elektrondy bılettiń qanshalyqty suranysqa ıe ekenin atap ótti.
«Kólik kartalaryn satatyn qaladaǵy 15 satý beketinde alǵashqy kezdegideı uzyn-sonar kezek joq. Qalada 106 563 biryńǵaı, 22 149 oqýshy kartalary satyldy. Al qazir satylymda 26 837 biryńǵaı, 24 851 oqýshy kartasy bar. Búginde 14 600 biryńǵaı kartasyna tapsyrys berdik», — dedi spıker.
