Tarazda órtengen qamys arasynan er adamnyń múrdesi tabyldy
TARAZ. QazAqparat – Jambyl oblysynda órtengen qamys arasynan er adamnyń múrdesi tabyldy, dep habarlaıdy QazAqparat Polisia.kz portalyna silteme jasap.
Portal málimetinshe, 29 tamyz kúni Taraz qalasynyń ortalyǵyna jaqyn ornalasqan Zerbulaq kóliniń jaǵalaýyndaǵy qamys órtengen. Sol sátte-aq Talas shaǵyn aýdanynyń turǵyndary órt sóndirýshilerdi shaqyryp, olar tezarada otty sóndirgen.
«Sodan keıin iske polıtsııa qyzmetkerleri kiristi. Óıtkeni, órtengen qamystyń arasynan zorlyq-zombylyq belgileri joq er adamnyń múrdesi tabylǵan edi. Sál keıinirek onyń taıaý mańda turatyn oblys ortalyǵynyń 48 jastaǵy turǵyny ekendigi anyqtaldy. Múrdeni qaraý barysynda denesinen qandaı da bir zaqymdaný anyqtalǵan joq», - delingen taratylǵan aqparatta.
Sot-medıtsınalyq saraptamanyń aldyn ala qorytyndysyna sáıkes, azamat denesiniń 80 paıyzyn kúıik shalýdan mert bolǵan. Órt shyqqan jerge taqaý mańnan benzınniń ótkir ıisi bar plastık bótelke tabylǵan.
Polıtsııanyń aldyn ala boljamyna qaraǵanda, ólgen adam ózin-ózi órtep jibergen. Atalǵan fakti boıynsha QR Qylmystyq kodeksiniń 105-baby 1-bóligi boıynsha sotqa deıingi tergeý bastaldy. Ózin-ózi óltirý sebebi anyqtalyp jatyr, birqatar sot-medıtsınalyq saraptama taǵaıyndalǵan.
Aıta keteıik, birneshe kún buryn Taraz qalasyndaǵy meıramhanalardyń biriniń janynan er adamnyń denesi tabylǵan bolatyn. Tórt kúnnen keıin qylmysty jasady degen aıyppen 33 jastaǵy kúdikti ustaldy.
