Ulttyq festıval: Tarazda óner men dástúr jańǵyrady
TARAZ. KAZINFORM — 2026 jyldyń 23-24 sáýirinde Taraz qalasyndaǵy «Kóne Taraz» tarıhı-etnomádenı kesheninde «Taraz — qolónershiler qalasy» Halyqaralyq qolónershiler festıvali uıymdastyrylady, dep habarlaıdy Jambyl oblysynyń ákimdigi.
— Ulttyq festıvaldi ótkizýdegi negizgi maqsat — óńirdiń týrıstik ımıdjin kóterý, otandyq qolónershilerdi halyqaralyq deńgeıde tanymal etý, sheteldik jáne jergilikti qolónershiler arasynda dostyq qarym-qatynas pen yntymaqtastyq ornatý, tájirıbe almasý, sondaı-aq, kenje qalyp bara jatqan ejelgi qolóner túrlerin saqtaý jáne qaıta jańǵyrtý, — delingen ákimdik habarlamasynda.
Festıvalǵa shetelden (Qyrǵyzstan, Ózbekstan, Tájikstan), kórshi óńirlerden (Almaty, Túrkistan) keletin jáne jergilikti 100-den astam sheber qatysady.
Festıval aıasynda kórermenderge erekshe kóńil kúı syılaý maqsatynda «Taraz — qolónershiler qalasy. Dástúr men zamanaýı qolóner» taqyrybynda ǵylymı-praktıkalyq konferentsııa, qolóner buıymdarynyń kórmesi men sheberlik saǵattary, «Meniń álemim: qııal men shynaıylyq» atty jas qolónershiler men sýretshilerdiń kórmesi ótedi.
Odan bólek sán men dástúrdi toǵystyratyn «ASPARA FASHION WEEK» halyqaralyq sán aptalyǵy, «Gınnes» rekordtar kitabyna engen kıizdiń janynda «Dombyra Party» is-sharasy, ulttyq naqyshtaǵy kıimderdiń sán kórsetilimi jáne óner juldyzdarynyń gala-kontserti uıymdastyrylady.
Festıvalge qatysýshy qonaqtarǵa kórme buıymdaryn satyp alýǵa jáne Taraz qalasyndaǵy tarıhı-mádenı oryndarǵa ekskýrsııa jasaýyna tolyq múmkindik qarastyrylǵan.
Bul kúnderi Taraz ulttyq dástúr men shalqyma shabyttyń toǵysqan ortaq mekenine aınalmaq.