Tarazda oqýshy sot arqyly ákesinen alıment óndirip aldy

TARAZ. KAZINFORM – Tarazda jekemenshik mektepte oqıtyn 11 synyp oqýshysy sot arqyly jyldar boıy ózimen aralaspaǵan jáne materıaldyq qoldaý kórsetpegen ákesinen alıment óndirip alýǵa qol jetkizdi, dep habarlaıdy Joǵarǵy sot.

11-synyp oqýshysy aı saıyn 68 myń teńge kóleminde oqý aqysyn tóleıdi.

2008 jyly oqýshynyń ákesi eki balasyna, onyń ishinde osy qyzyna qatysty ata-ana quqyqtarynan bas tartý týraly aryz jazyp, ony notarıaldy túrde kýálandyrǵan.

2018 jyly qyzdyń anasy men aǵasy qaıtys bolǵan. Qazirgi ýaqytta ol ájesimen birge turady jáne tolyqtaı onyń asyraýynda.

Ákesi eshqandaı materıaldyq kómek kórsetpegen, qarym-qatynastan qashqaqtaǵan, al kómek suraǵan kezde qyzynyń telefon nómirin buǵattap otyrǵan.

Sotqa alıment óndirý týraly talap qoıýmen júgingende, oqýshy óziniń qarjylyq qıyndyqtarǵa tap bolǵanyn kórsetken: oqý men turmysqa baılanysty barlyq shyǵyndy ájesi óteıdi. Al qarajat tek azyq-túlik pen eń qajetti qajettilikterge ǵana jetedi.

Sotta ákesi talapty ishinara qanaǵattandyrýdy surap, basqa nekeden týǵan tórt balasynyń bar ekenin jáne nesıelik mindettemelerin alǵa tartqan. Alaıda onyń eńbekke qabiletti ekeni jáne birneshe kásiporynnan tabys tabatyny anyqtalǵan.

Sonymen qatar, sheshim shyǵarylǵan kúni jaýapker jeke kásipker retinde tirkeýden shyqqany, al oǵan deıin kóp uzamaı taǵy tórt balaǵa ákelik quqyqty resimdegeni belgili bolǵan.

Sot muny alıment mólsherin jasandy túrde tómendetýge baǵyttalǵan áreket retinde baǵalady.

Taraz qalalyq soty ákeden qyzy mektepti aıaqtaǵanǵa deıin aı saıyn 17 AEK (66 844 teńge) mólsherinde alıment óndirý týraly sheshim shyǵardy.

Ákesi bul sheshimge apellıatsııalyq tártippen shaǵymdanǵan.

Jambyl oblystyq soty birinshi satydaǵy sot sheshimin ózgerissiz qaldyrdy.

Sot aktileri zańdy kúshine endi.

Aıta keteıik, sheteldikterdiń Qazaqstan azamattarymen ortaq balalary bolǵan jaǵdaıda alıment tóletý tetikteri bar. Bul jóninde QR Ádilet mınıstrligi Májbúrlep oryndatý komıtetiniń tóraǵasy Maqsat Balabekov Ortalyq kommýnıkatsııalar qyzmetinde ótken brıfıngide málimdedi.

Almatyda 17 boryshkerge alımentten jaltarǵany úshin is qozǵaldy.