Tarazda Naýryz merekesine oraı jańa «Arbat-3» jaıaý júrginshiler aleıasy ashylady
TARAZ. QazAqparat – Jambyl oblysynyń ákimi Berdibek Saparbaev Taraz qalasyn aralap, birqatar nysanmen tanysty, - dep habarlaıdy QazAqparat tilshisi.
Aımaq basshysy aldymen «Baryshan» massıvine áli kúnge nege aýyz sý berilmeı otyrǵanyn anyqtaý úshin Jaýǵash batyr kóshesindegi sorǵy stantsııasyna at basyn burdy. Atalǵan massıv turǵyndary áleýmettik jeliler arqyly shaǵymdaryn bildirgen bolatyn.
Ótkizgishtigi saǵatyna 1,5 myń tekshe metrdi quraıtyn ekinshi kótermedegi sorǵy stantsııasy ótken jyldyń jeltoqsan aıynda salynǵan, tıisti qabyldaý aktisi bar. Ol «Baryshan», «Sahzavod» jáne «Kırpıchnyı» massıvterin aýyz sýmen qamtamasyz etýge arnalǵan. Sońǵy eki aýdan áli kúnge tórt uńǵymanyń sýyn paıdalanyp otyr desek, al, «Baryshanda» sý múlde joq, biraq qubyrlar tartylǵan.
Belgili bolǵandaı, sorǵy stantsııasyn atalǵan massıvtiń ishki jelilerimen baılanystyratyn 80 metrlik qubyr áý basta jobada qamtylmaı qalyp ketken. Jaýapty qurylymdardyń mundaı salǵyrttyǵy men áreketsizdigin oblys ákimi qatal synǵa aldy.
«Nege sorǵy stantsııasymen birge sý qubyry jelisiniń qurylysyn qatar júrgizip, birge aıaqtaý múmkin bolmady? Eger adamdar áli kúnge sýsyz otyrǵan bolsa, bul kimge kerek? 80 metr qubyr tartý úshin bir-aq apta jetedi, al sizderdiń uqypsyzdyqtaryńyzdyń zardabyn qazir qanshama adam tartyp otyr. «Jambyl sý» da tutynýshylar sanyn arttyrýǵa múddeli emes pe?» - dedi Berdibek Saparbaev.
Anyqtalǵan kemshilikter boıynsha óńir basshysy kinálilerdi jazalaýdy jáne kemshilikterdi joıýdy tapsyrdy.
Budan soń Berdibek Saparbaev qurylysy aıaqtalýǵa jaqyn qalǵan «Arbat-3» jaıaý júrginshiler alleıasyn aralap kórdi. Qazir bes pavılonnyń syrtqy bezendirilýi boıynsha jumystar júrgizilýde, onda ulttyq taǵamdar meıramhanalary, kórkemóner sheberhanalary men balalarǵa arnalǵan zaldar ornalaspaq. Sondaı-aq, «Áýlıe-Ata» meshiti de qalpyna keltirilýde. Barlyq jumystar osy aıdyń 20-na deıin aıaqtalyp, Naýryz merekesi qarsańynda paıdalanýǵa berilmek. Munda kóne qala turǵyndary men qonaqtary sýburqaqtyń salqyn lebin sezinip, ortaǵasyrlyq sán-saltanatqa kýá bola alady.
«Barlyǵy birdeı úlgide oryndalýy tıis. Eń bastysy – jaıaý júrginshiler aımaǵy adamdardyń jaǵymdy ári súıikti tynyǵý ornyna aınalýy úshin barlyq qolaıly jaǵdaılar jasalaýy tıis», - dep atap ótti oblys ákimi.
