Tarazda nan baǵasy taǵy da qymbattady
TARAZ. QazAqparat – Taraz qalasynda birinshi surypty unnan jasalǵan nan baǵasy 5 teńgege qymbattady, dep habarlaıdy QazAqparat tilshisi.
Ótken senbiden bastap óńirde nan baǵasy 70 teńgeden 75 teńgege kóterildi. Bul týraly aýyl sharýashylyǵy basqarmasy azyq-túlik jáne eksport bóliminiń basshysy Mars Seıdybaev BAQ ókilderine bergen suhbatynda atap ótti.
- Buǵan deıin aqpan aıynda nan baǵasy 65 teńgeden 70 teńgege kóterilgen edi. Oǵan 2018 jyldyń sońynda bıdaı baǵasynyń 45 teńgeden - 65 teńgege, 1 surypty unnyń 63 teńgeden - 94 teńgege deıin qymbattaýy áser etken bolatyn. Inflıatsııany tejeý maqsatynda 5 naýryzdan bastap turaqtandyrý qorynan 94 teńgeden alynǵan 4 314 tonna unnyń kelisi naýbaıhanalarǵa 85 teńgeden 17 shildege deıin jetkizilip, bólke nannyń baǵasy 70 teńge deńgeıinde turaqtaldy. Ol úshin turaqtandyrý qorynan 38,8 mıllıon teńge qarjy jumsaldy. Qazirgi ýaqytta nan baǵasynyń ósýine 3-klasty astyq bıdaıynyń baǵasy - 70-75 teńge, un baǵasynyń - 96-105 teńge aralyǵynda kóterilýi áser etip otyr, - dedi Mars Seıdybaev.
Aıta ketý kerek, oblysta astyq orý naýqany júrip jatqanymen, orylǵan bıdaıdyń kólemi naryqtaǵy bıdaı baǵasyn tómendetýge óz áserin tıgizbeıdi, biraq baǵa turaqtylyǵyn qamtamasyz etpek.
Aýyl sharýashylyq basqarmasynyń mamandary naryqtaǵy jaǵdaıdy zerdeleı kele Taraz qalasy men oblys ortalyǵyna jaqyn mańdaǵy aýdandarda as atasynyń baǵasy 5 teńgege kóterilgenin, ıaǵnı maksımaldy quny 75 teńgeden aspaıtynyn aıtady. Olardyń aıtýynsha, oblystaǵy bir bólke nannyń ortasha baǵasy respýblıka boıynsha eń tómengi 70-75 teńge deńgeıinde saqtalyp otyr.
«Qazirgi tańda turaqtandyrý qorynda 686 myń bólke nan qory bar. Bul rette turaqtandyrý qoryndaǵy nan 55 teńgeden áleýmettik dúńgirshekter, kommýnaldyq bazar jáne Korzına, Small, Nurıslam, Dámdes, Gaýhar sekildi basqa da iri saýda oryndary arqyly turaqty ótkeriledi. Sondaı-aq, Taraz qalasynyń saýda oryndarynyń basym bóliginde nandy ózindik qunynan tómen baǵadan taratý naýqany «Assortı», «Krıstal», «Nurıslam», «Akbar» jáne taǵy basqa saýda oryndarynda jalǵasady» delingen basqarmanyń málimetinde.
