Tarazda nan baǵasy qymbattaı ma
TARAZ. QazAqparat - Tarazda bólke nan baǵasynyń birden on teńgege ósip, 65 teńgeden 75 teńgege qymbattaýyna baılanysty naqty jumystar qolǵa alynyp, baǵa qaıta qalpyna keltirildi, dep habarlaıdy QazAqparat.
Áleýmettik jelilerde «Taraz qalasynda nan baǵasy qymbattap ketti» degen málimet taralyp, túrli pikirler aıtylýda. Taralǵan aqparatta bir bólke nannyń quny 65 teńgeden 75 teńgege óskeni kórsetilgen. Búginde ol baǵa qaıta qalpyna keltirilip, baqylaýǵa alyndy. Alaıda, ol as atasynyń quny birjola turaqtandy degen sóz emes. Bul boıynsha naqty monıtorıng júrgizilip, jýyq arada naqty sheshim qabyldanbaq. Ol týraly oblystyq aýyl sharýashylyq basqarmasynyń basshysy Berik Nyǵmashev aıtty.
«19 qarasha kúni qaladaǵy saýda oryndarynda nan baǵasynyń qymbattaǵany týraly málimet tarady. Barlyq saýda oryndary men dúkenderge monıtorıng júrgizilip, eki iri nan óndirýshiniń ótkizý baǵasyn 10 teńgege kótergeni anyqtaldy. Ol aldyn ala jergilikti bılikpen kelisilip, qabyldanǵan sheshim emes. Sondyqtan shuǵyl jıyn ótkizip, qaladaǵy nan óndirýshi 8 jeke kásipkermen kezdestik. Olar bıdaı men un baǵasynyń ósýine oraı nan baǵasyn da kóterýdi surap otyr. Sol arqyly jumysshylardyń aılyǵyn ósirip, ózderiniń tehnıkalyq jaǵdaıyn jaqsartpaq. Biz olarmen ortaq kelisimge keldik»,- degen basqarma basshysy aldaǵy 6-7 kúnde nan zaýyttarynyń jumysy men tabysyna hronometraj júrgiziletinin jetkizdi. Sol boıynsha olardyń naqty tabysy men shyǵyndary esepteledi. Osydan keıin ǵana naqty sheshim qabyldanbaq. Sheshim shyqqansha nan 65 teńgeden satylady. Belgilengen ýaqyt aralyǵynda baǵanyń ósip ketpeýin tıisti oryndar qadaǵalaýda ustaıdy.
Berik Bolatuly un baǵasynyń ósimine oraı aldaǵy ýaqytta bir bólke nannyń quny 2-3 teńgege ósýi múmkin ekenin de jasyrmady.
Aıta ketý kerek, 22 qazandaǵy jaǵdaıǵa sáıkes birinshi sortty bıdaı unynan pisirilgen 1 kg nannyń quny Tarazda 100 teńgeni quraǵan. Bul - respýblıka kólemindegi eń arzan baǵa. Al, bir bólke nannyń salmaǵy 600-650 grammdy quraýy tıis.
«Qazirgi tańda turaqtandyrý qorynda qarjylaı saqtalǵan 717 myń bólke nan bar. 15-20 kún aralyǵynda 17 myń nandy ótkerdik. Ol arnaıy dúkenderge 55 teńgeden jetkizilip, 58 teńgeden satylýda. Sonymen qatar, turaqtandyrý qorynda 417 tonna un bar. Qajet bolsa, basqa da qoldaý kórsetýge daıynbyz», -deıdi basqarma basshysy.
Ǵıbrat Sembaı
