Tarazda Murathan Toqmádıge qatysty sot otyrysy bastaldy
TARAZ. QazAqparat - Búgin Tarazda uıymdasqan qylmystyq toptyń jetekshisi, bıznesmen Murathan Toqmádıge baılanysty sot protsesi bastaldy, dep habarlaıdy «QazAqparat» HAA tilshisi.
Kólemi 79 tom bolatyn Qylmystyq isti sýdıa Azamat Tilepov qaraıdy. Aldyn ala tyńdalymda protseske alqabılerdiń qatysý-qatyspaýy belgili bolady, dep túsindirdi Jambyl oblystyq qylmystyq ister boıynsha mamandandyrylǵan aýdanaralyq sotynda.
Eske salaıyq, «Depýtattyq korpýs» qylmystyq tobynyń jetekshisi M.Toqmádı 2017 jyldyń qazanynda Almaty qalasy Almaly aýdandyq sotynyń úkimimen bopsalaýshylyq jasaǵany úshin jáne zańsyz qarý-jaraq saqtaǵany úshin sottalǵan edi. Sot ony úsh jylǵa bas bostandyǵynan aıyrǵan bolatyn.
Belgili bolǵandaı, 2017 jyldyń qazanynda shyqqan suhbatynda sottalýshy M. Toqmádı bankır Erjan Tátishevti 2014 jyldyń 19 jeltoqsanynda Jambyl oblysy Qordaı aýdany Otar stansasy mańynda ańshylyqqa shyqqan kezde atyp óltirgenin moıyndaǵan. Budan bólek, jemqorlyq jasaǵanyn - QR ІІM Tergeý-jedel tobynyń basshysy Erjan Artyqbaevqa aqshalaı syıaqy bergenin de moınyna alǵan.
Endi M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, qorqytyp alýshylyqpen ne bandıtızmmen adam óltirý) qarastyrylǵan qylmystar jasady degen aıyp taǵylýda.
