Tarazda múmkindigi shekteýli jandarǵa arnalǵan ońaltý kesheni ashyldy
TARAZ. QazAqparat – Jambyl oblysynyń ákimi Berdibek Saparbaevtyń qatysýymen Taraz qalasynyń Mamyr toǵaıynda múmkindigi shekteýli jandarǵa arnalǵan «Asar» ońaltý-saýyqtyrý ortalyǵy ashyldy, dep habarlaıdy QazAqparat tilshisi.
«Asar» ońaltý-saýyqtyrý kesheniniń qurylysy byltyr bastalǵan edi. Keshen qurylysyna 57 mıllıon teńge jumsalsa, oǵan «Aıqyn MSB» JShS demeýshilik ete bildi. Bıýdjet qarjysy shyǵyndalǵan joq.
Jergilikti bılik tarapynan 0,9 ga jer bólingen, ondaǵy nysandardyń jalpy aýdany 900 sharshy metrden asady. Keshenniń negizgi mindeti – múmkindigi shekteýli jandardyń qoǵamǵa beıimdelýine, onyń qajetti bir bólshegi ekendigin sezindirýge, olardy kásipke baýlyp, ózderiniń fızıkalyq múmkindikterine sáıkes tabys tabýǵa yqpal etý. Ortalyqta bir mezette 60 adamǵa deıin oqyp, jumys isteı alady.
Keshen eki korpýstan – negizgi jáne bıznes-ınkýbatordan, ıaǵnı sheberhanalardan turady. Birinshisinde 30 bólme bolsa, bıznes-ınkýbatorda taǵy segiz bólme bar. Múgedektigi bar adamdar úshin jeti tigin, úsh tokarlyq, frezerlik jáne lazerlik stanoktar, ýsaqtaǵysh qondyrǵylar ornatylǵan. Ortalyqta óz betinshe qozǵalyp nemese otyryp jumyspen aınalysa alatyn kelýshiler jumysqa ornalasý nemese óz isin ashý úshin jańa kásipterdi ıgeretin bolady.
Barlyq bólmeler qajetti jıhazdarmen jabdyqtalǵan, sportpen shuǵyldanýǵa nıettiler úshin velotrenajer, tennıs ústeli jáne júgirý jolaqtary da qamtylǵan.
«Osydan bir jyl buryn biz kelesi jyly jańa keshen salynady dep ýáde bergen edik. Ýáde oryndaldy. Endi keshendi keńeıtip, monsha, basseın, ıppoterapııa ortalyǵyn salý qajet. Sizder úlken kúsh-jigerge ıesisizder, kezdesken qıyndyqtardy jeńýde jáne maqsatqa jetý jolynda kópke úlgisizder. Demeýshiler men qurylysshylarǵa da sapaly jumystary úshin alǵysymdy aıtamyn. Barshańyzdy Naýryz merekesimen quttyqtaımyn!»- dedi Berdibek Saparbaev.
«Asar» ZTB tóraǵasy Rýslan Tólegenov kómek qolyn sozǵan barsha adamdarǵa shyn júrekten rızashylyǵyn jetkizdi.
«Búgin biz úshin úlken mereke. Ortalyqtyń el Táýelsizdiginiń 30 jyldyǵyna oraı ashylýy onyń mánin tipti arttyra túskendeı. Áleýmettik salada memlekettik qoldaýdyń jyl saıyn artyp kele jatqany belgili. Sońǵy jyldardaǵy qıyn jaǵdaılarǵa, álemdik ekonomıkalyq daǵdarysqa jáne koronavırýstyq pandemııaǵa qaramastan, birde-bir áleýmettik pakettiń qysqarýyna jol berilgen joq. Kerisinshe, qoldaý sharalary artty», - dedi Rýslan Tólegenov óz áserimen bólisip.
Budan soń «Múgedekterdiń jastar qoǵamy» qoǵamdyq birlestiginiń tóraǵasy Áıgerim Dáýletbaeva oblys ákimin jańa ǵımarattarmen tanystyrdy. Al, Sıvara Nýrmatova ınvataksı dıspetcherlik qyzmeti keńsesinde ótken jyldyń ózinde 17 myńnan astam kóliktik qyzmet kórsetilgenin jetkizdi. Berdibek Saparbaev jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekovke taǵy eki ınvataksı kóligin satyp alýǵa qarajat qarastyrýdy tapsyrdy. «Bul balalarǵa da, eresekter úshin de úlken kómek bolady», - dedi aımaq basshysy.
Sondaı-aq, ortalyqta balalardy jalpy bilim beretin mektepte oqytýǵa daıyndaıdy. Psıhologııalyq qyzmet, kúndizgi statsıonar palatalary, massaj, dárigerlik qabyldaý jáne em-dom, elektroforez kabınetteri jumys jasaıdy.
Bıznes-ınkýbatorda eresekter aǵash oıý, tigin, tokarlyq jumystarmen aınalysa alady. Oblys ákimi jaqyn mańda ornalasqan fýtbol alańyn da «Asarǵa» berýdi júktedi. Sondaı-aq, irgedegi 2,6 myń sharshy metr jerge ıppoterapııa ortalyǵynyń qurylysy bastalýda.
