Tarazda múgedektigi bar adamdarǵa arnalǵan elimizdegi alǵashqy monsha salynbaq
TARAZ. QazAqparat – Jambyl oblysynyń ákimi Berdibek Saparbaev Taraz qalasyndaǵy «Asar» ońaltý ortalyǵynyń qurylysy barysymen tanysty, dep habarlaıdy QazAqparat tilshisi.
«Asar» Jambyl oblysynyń múgedektermen jumys isteıtin uıymdar odaǵy» Zańdy tulǵalar birlestigine arnalǵan ońaltý ortalyǵynyń qurylysy óńir basshysynyń jeke tapsyrmasy boıynsha bastalǵan bolatyn. Ortalyqtyń qurylysy qalanyń shet jaǵyndaǵy, artyq shý men qarbalastan alys Mamyr toǵaıyndaǵy jasyl jelektiń ortasynda júrgizilýde.
Ortalyq ázirge eki ǵımarattan turady. Onyń biri tolyq kúrdeli jóndeýden ótken nysan bolsa, ekinshisi – múmkindigi shekteýli jandarǵa arnap jergilikti qurylys kompanııasy tegin salyp bergen ǵımarat.
Qala ákimi Aıtqazy Qarabalaevtyń aıtýynsha, ortalyqtaǵy basqa da jumystar tarazdyq kásipkerlerdiń kómegimen qaıtarymsyz negizde oryndalýda. Olardyń birqatary qurylys materıaldaryn jetkizip berse, endi biri aqshalaı qolǵabys etýde.
«ASAR» ZTB basshysy Rýslan Tólegenov jańa ońaltý ortalyǵynyń josparlarymen bólisti.
Onyń aıtýynsha, ortalyq úsh baǵyt boıynsha jumys isteıdi. Olar: fızıoterapııa, zooterapııa jáne bıznes-oqytý. Ondaǵy maqsat – barlyq tıisti úkimettik emes uıymdardy biriktirý, olardyń kúsh-jigerin, bıýdjettik jáne demeýshilik qarajattaryn artyq shyǵyndamaý, bir-birin qaıtalamaý, múgedekter ómiriniń máselelerin sheshý, olarǵa jan-jaqty qoldaý kórsetý.
Múgedekter arbasyndaǵy Rýslan erekshe adamdardyń máselelerinen barynsha habardar.
«Biz kelgen adamnyn eń aldymen qanshalyqty qabiletti ekendigin anyqtaımyz, sodan keıin ony statsıonarǵa nemese kádesyılar jasaý sheberhanalaryna jumysqa jiberemiz. Sondaı-aq, óz bıznesin uıymdastyrýǵa jáne júrgizýge úıretemiz. Jumysymyzdy osy baǵytta júıeleı túskimiz keledi,-deıdi R. Tólegenov.
Sonymen qatar, ońaltý ortalyǵynda turaqty kútimdi qajet etetin múgedekterdiń týystaryna psıhologııalyq jáne praktıkalyq kómek kórsetý baǵdarlamasyn iske asyrý josparlanýda.
Berdibek Saparbaev ońaltý ortalyǵyndaǵy jumystardyń jaı-kúıimen tanysyp, barlyq úı-jaılardy qarap shyqty. Nazaryna ilingen keıbir kemshilikterdi tez arada joıýdy buıyrdy.
Sondaı-aq, ol ortalyqtyń josparlaryna birqatar túzetýler engizdi. Atap aıtsaq, oblys ákimi ortalyqqa jumysqa keletin mamandardyń arasynda massajıst joq ekendigine nazar aýdardy. Biraq bul tapshy mamandyq máselesin kórý qabileti nashar adamdardy oqytý arqylý sheshýge bolady. Bul oraıda kórý qabileti nashar adamdarda qoldyń sezimtaldylyǵyn arttyrý talap etiletindigi belgili. Demek, bul olardyń jetistikke jete alatyn birneshe mamandyqtardyń biri desek qatelespeımiz. Osyǵan oraı oblys ákimi medıtsınalyq kolledjde múmkindigi shekteýli jandar arasynan massajısterdi daıyndaıtyn arnaıy top ashýdy tapsyrdy.
Sondaı-aq ortalyqpen tanysý barysynda oblysta múmkindigi shekteýli adamdardyń qajettilikteri eskerilip, salynǵan birde-bir monsha joq ekendigi belgili boldy.
«Mundaı monsha Qazaqstannyń eshqandaı óńirinde joq», — deıdi R.Tólegenov.
«Onda ondaı monshany biz salaıyq», — degen oblys ákimi jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekovke atalǵan jobany ázirleýdi uıymdastyrýdy, sondaı-aq ortalyqtyń tehnıkalyq jabdyqtalýyna qajettilikterdi naqtylap, máselelerdi sheshý jóninde tapsyrma berdi.
Oblys ákimi aýmaqty abattandyrý jáne ıppoterapııa jobasyn iske asyrý sharalaryn jedeldetýdi, kún jylı túskende atalǵan jobanyń jumysyn bastaý kerektigin basa aıtty.
