Tarazda metall synyǵyn qabyldaý ornynda artıllerııalyq arsenal tabyldy
TARAZ. Aqpannyń 3-i. QazAqparat /Galına Skrıpnık/ - Tarazda «Rezeńke-tehnıkalyq buıymdar» JShS-niń aýmaǵynda ornalasqan metall synyǵyn qabyldaý ornynda artıllerııalyq oqtumsyqtar arsenaly tabyldy.
Bul týraly Jambyl oblystyq ishki ister departamentiniń baspasóz qyzmetinen habarlady.
«Metall synyǵyn qabyldaıtyn orynnyń qojaıynynyń aıtýynsha, «áskerı júkti» oǵan «Moskvıch» kóligine mingen bireý ákelgen. Álgi azamat metaldyń ár kelisin 17 teńgeden ótkizip ketken», deıdi departamenttiń baspasóz qyzmetiniń jetekshisi Roza Qaldybekova.
Tótenshe jaǵdaılar vedomstvosynyń qyzmetkerleri men polıtseıler osy qabyldaý ornynan KM-30 gaýbıtsasynyń 18 oqtumsyǵyn tapqan, onyń altaýy - isten shyqqan jaryqshaqty-fýgasty oqtumsyq bolǵan.
Departament ókili polıtsııa maıory Dáýren Ǵumarovtyń aıtýynsha, «051» qyzmetine burynǵy rezeńke zaýytynyń aýmaǵynda artıllerııalyq mınalardyń jatqany týraly qońyraý túse salyp, oqıǵa ornyna oblystyq barlyq jedel qyzmetteri jetken. Jol polıtsııasy men patrýldik polıtsııa seriktestik pen onyń mańaıyndaǵy aýmaqty qorshaǵan. Kásiporynnyń ishinde bolǵan adamdardyń barlyǵy qaýipsiz aýmaqqa kóshirilgen.
Tabylǵan barlyq arsenal arnaıy kólikpen Jambyl aýdanynyń Aısha bıbi aýylyndaǵy polıgonǵa jetkizilip, sonda kózi joıylǵan.
Polıtseıler tótenshe oqıǵa faktisi boıynsha jedel-tergeý sharalaryn júrgizýde.
