Tarazda mektep bitirýshi túlek kólikpen kanalǵa túsip ketti

TARAZ. QazAqparat – Taraz qalasynda búgin mektep bitirgen túlek avtomobıldi basqara almaı kanalǵa kóligimen birge túsip ketti, dep habarlaıdy QazAqparat tilshisi.

«25 mamyr kúni Taraz qalasyndaǵy Táýke han kóshesinde ornalasqan «Qazaq handyǵy» monýmenti janynda «Leksýs» markaly kólik kanal sýyna túsip ketti. Patrýldik polıtsııa dereý oqıǵa ornyna bardy. Anyqtalǵandaı 21 jastaǵy kólik júrgizýshisi atalǵan jerge mektep bitirip jatqan tanys túlektermen birge merekeleýge kelipti. Ol kóliginen shyǵyp ketken kezde túlekterdiń biri kóliktiń rýline ıesiniń ruqsatynsyz otyryp, ony júrgizbek bolǵan. Nátıjesinde gaz ben tejegishti shatastyryp alǵan 17 jastaǵy mektep túlegi kólikpen birge kanal sýyna túsip ketken»-dep baıanap berdi bolǵan oqıǵany Jambyl oblystyq Polıtsııa departamenti baspasóz qyzmetiniń jetekshisi Gúlsara Muhtarqulova.

Polıtsııa departamentiniń málimetinde aıtylǵandaı, róldegi jasóspirim zardap shekpegen jáne ol kólikte jalǵyz bolǵan.

«Medıtsınalyq tekserýdiń nátıjesine sáıkes jasóspirim ishimdik ishpegen. QR ákimshilik quqyqbuzýshylyq týraly kodeksi 612 babynyń 2 tarmaǵyna saı atalǵan jasóspirimniń ata-anasy ákimshilik jaýapqa tartyldy. Atalǵan bapqa sáıkes 20 AEK (63 600 teńge) kóleminde aıyppul salynady», - deıdi ol.

Sondaı-aq, óz erkimen kólik basqarǵan mektep bitirýshi túlektiń ata-anasymen profılaktıkalyq áńgime júrgizilgen.

«Avtomobılge kelgen zardapty óteý kerek bolǵan jaǵdaıda, ekijaq azamattyq sot arqyly ózara sheshe alady», - deıdi G. Muhtarqulova.