Tarazda mektep aýlasyna Saǵadat Nurmaǵambetovtiń bıýsti ornatyldy

TARAZ. QazAqparat - Taraz qalasyndaǵy №10 mektepte Qazaqstannyń birinshi qorǵanys mınıstri, Keńes Odaǵynyń Batyry, Halyq qaharmany, armııa generaly Saǵadat Qojahmetuly Nurmaǵambetovtiń bıýsti ashyldy, dep habarlaıdy QazAqparat tilshisi.

Batyr bıýstiniń saltanatty ashylýynda Jambyl oblysy ákiminiń birinshi orynbasary Bekbolat Orynbekov jáne bir kezderi Saǵadat Nurmaǵambetovtyń qolastynda qyzmet atqarǵan «Ońtústik» óńirlik qolbasshylyǵy áskerleriniń birinshi qolbasshysy, zapastaǵy general-maıor Álıhan Jarbolov sóz sóıledi.

«Táýelsiz Qazaqstan Qarýly Kúshteriniń qalyptasý kezeńinde áskerı tájirıbesi mol, komandalyq jumysty tereń meńgergen Saǵadat Nurmaǵambetov eń laıyqty kandıdat bolatyn. Armııa generaly Qazaqstan Qarýly Kúshterin odan ári nyǵaıtý úshin kóp ter tókti»,- dedi Álıhan Jarbolov.

Sondaı-aq, general Jarbolov jaqynda Taraz qalasyndaǵy 13-móltekaýdanda jańa kóshege Saǵadat Nurmaǵambetovtyń esimi berilip, ańyzǵa aınalǵan áskerı kóshbasshy qurmetine eskertkish taqta qoıylǵanyn eske saldy.

Búginde Halyq qaharmany atyndaǵy №10 mekteptiń oqýshylary Saǵadat Nurmaǵambetovtiń erligin, ómir jolyn úlgi-ónege utady. Áıgili generaldyń qazaq armııasynyń damýyna qosqan úlesin joǵary baǵalaıdy. Bul týraly mektep basshysy Baýyrjan Bekturǵanov aıtyp berdi. Ol ózi basqaratyn oqý ordasyna Qazaqstannyń tuńǵysh qorǵanys mınıstriniń esimin berý jáne onyń bıýstin ornatý - mektep oqýshylary úshin úlken qurmet jáne joǵary jaýapkershilik ekenin atap ótti.