Tarazda medıtsınalyq kolledj memleketke qaıtaryldy
TARAZ. QazAqparat - Jambyl medıtsınalyq kolledji taıaýda eki mıllıard teńgege jeke kompanııanyń senimgerlik basqarýyna berildi, dep habarlady QazAqparat tilshisi.
Alaıda endi jańa ıesi ony memleketke qaıtarýy qajet. Onyń sebebi Tarazda ótken ÓKQ brıfınginde aıtyldy. Oblys ákimdiginiń qarjy basqarmasy basshysynyń orynbasary Sáken Asatovtyń aıtýynsha, eski medıtsınalyq bilim berý mekemesin senimgerlik basqarýǵa berý sheshimin oblys ákiminiń ókimimen qurylǵan jumys toby qabyldady.
Tender 2016 jylǵy 22 qarashada boldy, onyń nátıjesi boıynsha jeńimpaz «Darımet» medıtsınalyq ortalyǵy» JShS boldy. Kompanııa Jambyl medıtsınalyq kolledji úshin eki mıllıard teńge usyndy. Alaıda oblys prokýratýrasynyń narazylyǵyna baılanysty qarjy basqarmasynyń buıryǵymen tender nátıjesi joıylǵan bolatyn.
«Buǵan sebep tender ótkizgen kezde qarjy basqarmasynyń birinshi orynbasary Asqar Qyryqbaev qyzmettik issaparda bolǵan. Tender nátıjesine sol kisi qol qoıý qajet bolatyn», - dedi spıker.
Atap ótsek, «Darımet» medıtsınalyq ortalyǵy munymen kelispeı, sotqa talaparyz beredi. Biraq bul sheshim jarııalanbady, sebebi qarjy basqarmasy ózi ótkizgen tenderdi zańdy dep sanady.
Alaıda taıaýda tenderdiń basqa qatysýshysy «Taraz Trast» JShS - sotqa basqa talaparyz berdi. Olar buny zań buzýshylyq dep sanady. Nátıjesinde Jambyl aýdanaralyq mamandandyrylǵan ekonomıkalyq soty tender nátıjesin zańsyz dep tanydy.
«Jambyl medıtsınalyq kolledji burynǵysha memlekettiń basqarýyna qaıtarylady. Odan ári ony senimgerlik basqarýǵa berý máselesi ázirge ashyq kúıinde qalady», - dedi ol.
