Tarazda medıa forým ótti
Medıa forýmǵa belgili bloger, jýrnalıst Órken Kenjebek moderatorlyq jasady. Oǵan óńirdegi BAQ basshylary, tilshiler, baspasóz qyzmetiniń ókilderi jáne jýrnalıstıka mamandyǵynyń stýdentteri qatysty.
«Búgingi forým aqparaty taratýdyń jańa tásilderi, álemdik trendtegi taqyryptardan qalys qalmaý, kórermen men oqyrman tartýdyń jańa joldary aıtylatyn bolady. Búginde Jambyl oblysynyń BAQ ókilderi, jergilikti atqarýshy organdary da jańa medııanyń ıgiligin kórýde. Barlyq aýdan ákimdikteri men oblystyq basqarmalardyń ınternet saıttary, áleýmettik jelilerde arnaıy paraqshalary bar. Ony turaqty júrgizip otyrý úshin arnaıy mamandar bekitilgen, - degen oblys ákimdiginiń ishki saıasat basqarmasynyń basshysy Berik Qurmanǵalı forým jumysyna sáttilik tiledi.
Jıynda sóz alǵan spıkerler qatarynda «Astana» telearnasy «Bizdiń ýaqyt» baǵdarlamasynyń júrgizýshisi Jaına Slambek, «Egemen Qazaqstan» respýblıkalyq gazeti bas redaktorynyń orynbasary Qambar Ahmetov, «Minber» jýrnalısterdi qoldaý ortalyǵynyń jetekshisi Esengúl Kápqyzy, «Qazaqstan» telearnasynyń júrgizýshisi, «Bilimmen bólis» jobasynyń avtory Nurmuhamed Baıǵara bar.
«Jańa medıa alǵash paıda bolǵanda dástúrli medııa ókilderi tosyrqaı qaraǵany jasyryn emes. Blogerler men gazet, telearna jýrnalısteriniń tilshileriniń arasynda biraz túsinispeýshilikter oryn alǵan bolatyn. Biraq ýaqyt óte kele naryq bárin rettedi. Jańa medıa dástúrli jýrnalıstıkaǵa kómekshi qural retinde oń áser ete bastady. Endigi kezekte gazetter ýaqyt talabyna saı bolýy úshin jańa medıanyń kómegine súıenýge týra keledi. Biz saıt arqyly gazettiń aýdıtorııasyn keńeıtýge jumys isteýdemiz. Áleýmettik jelidegi jarııalanymdar men pikirlerdi saraptap, qoǵamnyń pikirine qulaq túrip otyramyz», - dedi «Egemen Qazaqstan» jalpyulttyq gazeti bas redaktorynyń orynbasary Qambar Ahmetov.
Avtory: Ǵıbrat SEMBAI
