Tarazda lıft ishinde qalyp qoıǵan tórt turǵyn qutqaryldy

TARAZ. KAZINFORM – Tótenshe jaǵdaılar mınıstrliginiń qutqarýshylary Tarazda lıft ishinde qalyp qoıǵan turǵyndardy evakýatsııalady.

112 pýltine Taraz qalasynyń móltek aýdandarynyń birinde lıftini ashý qajettigi týraly habarlama tústi. Lıft ishinde múmkindigi shekteýli adam bolǵan.

Oqıǵa ornyna Tótenshe jaǵdaılar mınıstrliginiń Jedel-qutqarý jasaǵynyń bólimshesi jedel jetti.

- Qutqarýshylar gıdravlıkalyq quraldar men avarııalyq-qutqarý jabdyqtarynyń kómegimen lıft esigin ashyp, tórt turǵyndy evakýatsııalady. Qutqarylǵan áıelderdiń birine medıtsınalyq kómek kórsetilip, ol jedel járdem brıgadasyna tapsyryldy, - delingen habarlamada.

Vedomstvo lıftte turyp qalǵan jaǵdaıda kelesi erejelerdi saqtaý qajettigin eske salady:

– sabyr saqtap, jaqyndaryńyzdy tynyshtandyrý;
– dıspetcherge habarlasý;
– barlyq túımelerdi qatarynan baspaý;
– lıft esigin ózińiz ashýǵa tyryspaý;
– qoljetimdi syrtqy baılanys arnalaryn paıdalaný.

Aıta keteıik, SQO-da qutqarýshylar órt kezinde jarylys qaýpiniń aldyn aldy.