Tarazda latyn grafıkasyna kóshýge arnalǵan respýblıkalyq aptalyq ótýde

TARAZ. QazAqparat -Tarazda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda qazaq tilin latyn grafıkasyna kóshirý boıynsha aqparattyq-nasıhattyq respýblıkalyq aptalyq ótýde. Aýqymdy sharany QR Mádenıet jáne sport mınıstrligi Til saıasaty komıteti jáne oblys ákimdigi birlesip uıymdastyrýda, dep habarlaıdy QazAqparat.

Aptalyq aıasynda aldymen, «Qazaq tiliniń damýy - ulttyń damýy» taqyrybynda brıfıng uıymdastyryldy. Munan soń Taraz qalasyndaǵy Yqylas Dúkenuly atyndaǵy Mádenıet úıinde qazaq álipbıin latyn grafıkasyna kezeń-kezeńimen kóshirýdi qoǵamda nasıhattaý sharalaryna arnalǵan aptalyqtyń saltanatty ashylýy ótti.

«Respýblıkalyq aptalyq barysynda Taraz qalasynyń jáne birqatar aýdannyń memlekettik qyzmetshileri, muǵalimderi, jastary men oqýshylary qamtylady dep josparlanýda. Elimizdiń ár óńirinen kelgen til mamandary, belgili ǵalymdar qazaq álipbıiniń mazmuny men jańa emle-erejeleriniń mazmunyn túsindirmek. Sondaı-aq, dárister oqıdy», - dedi QR Mádenıet jáne sport mınıstrliginiń Til saıasaty komıtetiniń tóraǵasy Ǵalymjan Meldeshov.

Sondaı-aq, ashylý saltanatynda sóz alǵan «Til - Qazyna» ulttyq ǵylmı-praktıkalyq ortalyǵynyń ádistemelik basqarmasy dırektorynyń keńesshisi Orazkúl Asanǵazy, ortalyqtyń atqarýshy dırektory Erbol Tileshov, jazýshy, Memlekettik syılyqtyń ıegeri Beksultan Nurjekuly, Kádirbek Segizbaıuly, fılologııa ǵylymdarynyń kandıdaty Jazıra Aǵabekova latynnegizdi qazaq álipbıine kóshýdiń mańyzdylyǵyn jetkizdi. Jańa álipbıdiń sanamyzdy jańǵyrtýdaǵy róli, onyń emle-erejeleriniń qyry men syry aıtyldy. Tildik reformanyń keleli máseleleri men mindetteri jóninde taǵylymdyq, tanymdyq jáne ǵylymı taqyryptar qaýzaldy.

Aıta keteıik, aptalyq aıasynda kitap kórmesi uıymdastyryldy. Onda ádistemelik quraldar men ádistemelik sabaqtardy nasıhattaýǵa arnalǵan kitaptar, aýdıo-vıdeo sabaqtar qoıylǵan. Bes kúnge josparlanǵan aptalyq buǵan deıin Taraz qalasy men Jambyl aýdandarynda óz jalaýyn jelbiretse, aldaǵy kúnderi oblys ortalyǵynyń birqatar tarıhı-mádenı oryndary men joǵary oqý oryndarynda uıymdastyrylatyn kezdesýler men qoǵamdyq dárister arqyly jalǵasyn tappaq.