Tarazda qyzmetin óteý kezinde jaralanǵan polıtseıge páter beriletin boldy
TARAZ. QazAqparat - Oblys ákimi Asqar Myrzahmetov polıtsııa departamentine birneshe qyzmettik páter bólý týraly sheshim qabyldady. Baspana birinshi kezekte mindetin atqarý kezinde aýyr jaralanǵan polıtseı Bekjan Tilenshıevke beriledi, dep habarlaıdy QazAqparat tilshisi.
Bul týraly oblystyq polıtsııa departamentiniń baspasóz qyzmeti málimdedi.
«Aǵymdaǵy jyldyń 24 mamyrynda «Kóknár-2019» respýblıkalyq jedel-aldyn alý is-sharasyn uıymdastyrý úshin óńirge kelgen ІІM mınıstriniń orynbasary Mahambet Abısatov oblystyq polıtsııa departamentiniń bastyǵy Arman Orazalıevpen birge qalalyq aýrýhanada jatqan Bekjan Tilenshıevtiń kóńilin surap, ony ári qaraı emdeý úshin Nur-Sultan qalasyna jetkizý máselesi sheshilip jatqanyn habarlady» delingen vedomstvo málimdemesinde.
Eske sala ketsek, 2016 jyldyń 19 maýsymynda qalanyń 6-shaǵynaýdanynda ýchaskeni torýyldaý kezinde Taraz qalalyq ishki ister basqarmasynyń polıtsııa serjanty Bekjan Tilenshıev kópqabatty úıdiń kireberisine kirip ketken qarýly qylmyskerdiń izine túsip, ózi oqqa ushqan bolatyn. Aýyr jaraqattanǵan ol tósek tartyp qaldy. Buǵan deıin ol ІІM bastamasymen memlekettik kvota boıynsha Grekııada emdeldi. Odan ári emin Nur-Sultan qalasyndaǵy «Ulttyq neırohırýrgııa ortalyǵynda» jalǵastyrǵan. Oblys polıtsııa qyzmetkerleri óz áriptesine túrli kezeńde jalpy somasy 19 mıllıon teńge kóleminde aqshalaı kómek kórsetken.
Aıta keteıik, Bekjan Tilenshıev «Erligi úshin» medalimen marapattalǵan.
