Tarazda kúıeý balasy enesiniń úıin tonap, qajylyqqa jınaǵan aqshasyn alyp ketken
TARAZ. QazAqparat - Tarazda kúıeý balasy qaıyn enesiniń úıin tonady, dep habarlaıdy QazAqparat Jambyl oblystyq polıtsııa departamentine silteme jasap.
Taraz qalasynyń polıtsııa bólimine 66 jastaǵy áıel habarlasyp, úıi tonalǵanyn jetkizgen.
Shamamen saǵat 00:20-da belgisiz er adam úıine basa-kóktep kirip, qorqytyp, 2450 AQSh dollaryn, 100 000 teńgesin, 2 altyn saqınasy men uıaly telefonyn ashyq túrde alyp ketken.
Jábirlenýshi áıeldiń aıtýynsha, ol qajylyqqa barý úshin aqsha jınaǵan.
Atalǵan derekke qatysty Qylmystyq kodekstiń 191-baby 3-bóligi 3-tarmaǵy boıynsha sotqa deıingi tergeý amaldary bastaldy.
Jedel-izdestirý sharalarynyń nátıjesinde polıtsııa qyzmetkerleri eki kúdiktini anyqtap, ustady.
Olar - Taraz qalasynyń 47 jáne 51 jastaǵy turǵyndary.
Sondaı-aq, kúdiktilerdiń biri jábirlenýshiniń kúıeý balasy bolyp shyqty.
Ustalǵandar óz kinásin tolyq moıyndady. Tergeý amaldary júrip jatyr.
