Tarazda qurylysy «ǵasyrǵa jalǵasqan» ǵımaratta saýda oıyn-saýyq ortalyǵy ashylady
TARAZ. QazAqparat - Taraz qalasynda Naýryz meıramyn merekeleý qarsańynda jańa saýda oıyn-saýyq ortalyǵy ashylady, - dep habarlaıdy qala ákimdiginiń baspasóz qyzmetinen.
«Qurylysy ótken ǵasyrdan osy kezeńge deıin sozylyp kelgen ǵımaratta «Dos-Nar» kesheni ashylmaq, - deıdi qala ákimshiliginiń qyzmetkerleri - 2012 jyly Taraz qalasynda osydan 30 jyl buryn qonaqúı retinde salyna bastaǵan ǵımarat paıdalanýǵa berildi. Qazir onda memlekettik qurylymdar ornalasqan. Al myna «ǵasyr qurylysy» uzaq ýaqyt boıy ıesiz qańtarylyp, mańaıyndaǵy Máńgilik alaýdyń, ásem gúlzar men saıabaqtyń kórkin buzyp turǵan edi».
Burynǵy Mádenıet saraıyn óńirde buryn asa órkendegen teri shıkizatyn óńdeý jáne aıaq kıim tigý salasynyń jumyskerleriniń «mádenıet oshaǵy» etý kózdelgen edi. 1974 jyly salyna bastaǵan saraı qurylysy uzaqqa sozylyp ketken, al, atalmysh sala quldyrap, Keńes Odaǵy qulaǵan soń bul ǵımarat bos qalǵan.
2013 jyly «Dos-Nar» JShS jartylaı buzylǵan qurylys nysanyn satyp alyp, ǵımaratty tolyǵymen qaıta qalpyna keltirdi. Qazirgi sátte qurylysty qalpyna keltirý jumystary aıaqtalyp qaldy.
Úsh qabatty keshenniń jalpy aýmaǵy 12 myń sharshy metrdi qamtıdy. «Dos-Nar» seriktestigi bul jerde keptirilgen jemister, jemis-jıdekter men et ónimderin, sondaı-aq tońazytý jabdyqtaryn satatyn saýda mını-marketteri men azyq-túlik ónimderiniń sapasyn anyqtaıtyn zerthana, ónerkásip taýarlaryn satatyn dúńgirshekter ashpaq. Sonymen qatar, balalarǵa arnalǵan oıyn-saýyq ortalyǵy men 3D jáne 4D kınoteatry da qarastyrylyp otyr, deıdi «Dos-Nar» kesheniniń ákimshiliginiń ókilderi.
