Tarazda quqyq qorǵaý qyzmetin kórsetý ortalyǵy jumysyn bastady
TARAZ. QazAqparat - Jambyl oblysynyń turǵyndary Tarazda QR Táýelsizdik kúni qarsańynda ashylǵan Quqyq qorǵaý qyzmetin kórsetý ortalyǵynda (QQQKO) «bir tereze» qaǵıdasy boıynsha qajetti quqyqtyq qyzmetter men zańdy kómekterdi tegin ala alady, dep habarlaıdy «QazAqparat» HAA tilshisi.
Tarazdyń ortalyǵynda ornalasqan ortalyqtyń keńsesiniń saltanatty ashylý rásimine Jambyl oblysynyń ákimi Kárim Kókirekbaev, óńirdegi quqyq qorǵaý jáne memlekettik organdardardyń basshylary, prokýratýra organdarynyń ardagerleri qatysty.
«Ortalyqty ashý ıdeıasy Ult josparynyń 100-shi qadamynda kórsetilgen zań qyzmetterin bir jerge ıntegratsııalaýdy iske asyrý aıasynda týyndady, - dedi óńir basshysy. - Barlyq memlekettik organdar turǵyndarmen jáne qoǵamdastyqpen tyǵyz qarym-qatynas jasasýy tıis, sondaı-aq aqparatqa qoljetimdilikti qamtamasyz etýi qajet. «Bir tereze» qaǵıdasy osy jumysty tıimdi uıymdastyrý úshin utymdy bolmaq. Turǵyndarǵa sapaly, jyldam ári ashyq qyzmet kórsetilýi kerek. Memleket basshysynyń tapsyrmasyn oryndaý aıasynda oblystyq prokýratýramen birlesip, halyqtyń quqyqtyq saýattylyǵyn jetildirý úshin «Quqyq qorǵaý qyzmet kórsetý ortalyǵyn» ashyp otyrmyz».
Onyń óńirdegi alǵashqy Quqyq qorǵaý qyzmetin kórsetý ortalyǵy ekendigi atalyp ótildi. Jáne ol azamattardyń qandaı da bir memlekettik organdardyń kómegine júginbeı, tegin jáne qoljetimdi zańdy kómekterdi ala alýy maqsatynda ashyldy. Qajetti quqyqtyq qyzmetterdi baqylaý organdarynyń qyzmetkerleri, medıatorlar, probatsııalyq qyzmet ókilderi kórsetetin bolady.
Jambyl oblystyq ákimdiginiń baspasóz qyzmeti atap ótkendeı, ortalyqtyń zamanaýı ǵımaraty jańa ınjenerlik-tehnıkalyq jabdyqtarmen, elektrondyq kezek júıesimen jabdyqtalǵan. Sonymen qatar, kútý zaly, balalarymen kelgen klıentter úshin «balalar buryshy» jáne taǵy basqa qajetti ınfraqurylym bar.
Quqyq qorǵaý qyzmet kórsetý ortalyǵyn salýǵa jergilikti bıýdjetten 49,8 mıllıon teńge qarjy bólingen.
Ortalyqtyń negizgi mindeti shaǵymdardy shuǵyl sheshý, azamattardyń quqyq qorǵaý organdaryna jáne memlekettik organdarǵa degen senimin arttyrý, ákimshilik kedergiler men bıýrokratııany joıý bolyp tabylady.
