Tarazda qubyr jóndeý úshin qazylǵan shuńqyrǵa kólik túsip ketti
ASTANA. KAZINFORM - Taraz kósheleriniń birinde qubyr jóndeý jumystary úshin qazylǵan tereń shuńqyrǵa kólik túsip ketti, dep habarlaıdy oblystyq Polıtsııa departamentiniń baspasóz qyzmeti.
"16 maýsymda saǵat 17:50-de Tóle bı dańǵylynan Abaı dańǵyly baǵytyndaǵy «Leksýs RX300» markaly avtokóliginiń júrgizýshisi 3.1 Kirýge tyıym salynady jáne 1.23 Jóndeý jumystary atty jol belgilerin elemeı, magıstraldyq qubyr jóndeý jumystary júrgizilip jatqan avtojoldyń jabyq ýchaskesine kirip, qorshalmaǵan shuńqyrǵa qulaǵan.
Jol-kólik oqıǵasy saldarynan júrgizýshi, onyń áıeli jáne eki kámeletke tolmaǵan balasy zardap shekken" delingen habarlamada.
Polıtsııa qyzmetkerleri merdiger uıymǵa qatysty qylmystyq is qozǵady. Tergeýge deıingi tekserý júrgizilýde.
Kólik júrgizýshisi jol belgilerin elemegeni úshin ákimshilik jaýapkershilikke tartylatyn bolady.
Al, áleýmettik jelide osy apat bolǵan kezde túsirilgen vıdeo tarap jatyr. Onda júrgizýshiniń ózi de, otbasy músheleri de jaraqat alǵany aıtylady.
