Tarazda QR Prezıdenti janyndaǵy memakademııanyń fılıaly ashyldy
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev jumys saparymen Tarazǵa bardy, dep habarlaıdy QazAqparat tilshisi.
Búgin Qazaqstan Respýblıkasy Prezıdenti janyndaǵy Memlekettik basqarý akademııasynyń Jambyl oblysy boıynsha fılıaly ǵımaratynyń saltanatty ashylý rásimi ótti. Atalǵan jańa úsh qabatty ǵımarat Taraz qalasynyń ortalyǵynda salynǵan.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev pen Jambyl oblysynyń ákimi Asqar Myrzahmetov ǵımarattyń ishin aralap kórip, fılal ujymymen kezdesti. Sonymen qatar akademııa ǵımaratynyń kire berisine ornatylǵan eskertkish taqtanyń ashylý rásimine qatysty.
QR Prezıdenti janyndaǵy MBA rektory Fatıma Jaqypova jańa fılıaldyń tusaýkeserin ótkizip, Qazaqstan Respýblıkasy Prezıdenti janyndaǵy Memlekettik basqarý akademııasynyń qurylý tarıhy men qyzmeti jaıynda egjeı-tegjeıli aıtyp berdi. Ol prezıdenttik memlekettik qyzmet akademııasy Qazaqstandaǵy oqý-ádistemelik, ǵylymı jáne aqparattyq-saraptamalyq joǵary oqý orny sanalatyndyǵyn basa aıtty. Akademııa quramyna Basqarýshy kadrlardy daıyndaý ınstıtýty men Memlekettik basqarý ǵylymı-zertteý ınstıtýty kiredi.
Sondaı-aq fılıal ǵımaratynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi Jambyl oblystyq fılıalynyń ujymymen kezdesý boldy. Óńirlik semınar-keńes ótti.
Semınar aıasynda sóz sóılegen Jambyl oblysynyń ákimi Asqar Myrzahmetov QR Prezıdenti janyndaǵy MBA-nyń óńirlik fılıalynyń ashylý mańyzdylyǵyn aıryqsha atap ótti.
Aıta keteıik, Qazaqstan Respýblıkasy Prezıdenti janyndaǵy Memlekettik basqarý akademııasy 2005 jyly 31 mamyrda Qazaqstan Respýblıkasy Prezıdentiniń Jarǵysymen memlekettik qyzmetkerlerdiń biliktiligin arttyrý jáne daıarlaý/qaıta daıarlaý maqsatynda qurylǵan. Akademııa Qazaqstan Respýblıkasynyń memlekettik qyzmeti salasyndaǵy jalǵyz oqý-ádistemelik orny bolyp tabylady jáne memlekettik qyzmetkerleri deńgeıiniń biliktiligin arttyrý, daıarlaý/qaıta daıarlaýǵa baǵyttalǵan.
