Tarazda kortej uıymdastyrǵan mektep túlekteri jaýapqa tartyldy

TARAZ. KAZINFORM – Polıtsııa qyzmetkerlerimen aýmaqty patrýldeý barysynda Taraz qalasyndaǵy birneshe orta mekteptiń bitirýshi túlekteriniń oqý jylyn aıaqtaýǵa arnalǵan is-shara aıasynda kólik kortejin uıymdastyrǵany anyqtaldy. 

Kortej kezinde túlekter jol qozǵalysy erejelerin óreskel buzyp, qoǵamdyq tártipti saqtamaı, basqa jol qozǵalysyna qatysýshylardyń ómirine qaýip tóndirgen. 

Kólik quraldaryn basqarý kezinde qozǵalys erejesin buzý, avtokólikterdiń jolda júrý tártibin saqtamaýy, qorshaǵan ortaǵa qaýip tóndirý jaǵdaılary boıynsha QR Ákimshilik quqyq buzýshylyq týraly kodeksiniń birneshe baptarymen, barlyǵy 19 ákimshilik hattama toltyryldy. 

– Biz mektep bitirý keshterinen keıin mundaı jaǵdaılar bolýy múmkin ekenin boljadyq. Sondyqtan avtopatrýlder sanyn kóbeıtip, baqylaýdy kúsheıttik. Azamattardyń qaýipsizdigi – basty mindet jáne ony qamtamasyz etý úshin barlyq qajetti sharalardy qabyldaımyz, - dep atap ótti Taraz qalasy PB patrýldik polıtsııa batalonynyń komandıri Rýslan Orazbaqov. 

Polıtsııa departamenti azamattardy, sonyń ishinde mektep bitirýshiler men olardyń ata-analaryn, merekelik sharalardy ótkizýde qaýipsizdik pen zań talaptaryn qatań saqtaýǵa shaqyrady.