Tarazda koronavırýspen aýyrǵandar arnaıy ortalyqta ońaltýdan ótip jatyr
TARAZ. QazAqparat – Jambyl oblysy koronavırýstyń ekinshi tolqynyna jan-jaqty daıyndyq sharalaryn júrgizýde, dep habarlaıdy QazAqparat tilshisi.
Jambyl oblysynda COVID-19-ben aýyrǵan naýqastarǵa arnalǵan 120 tósektik elimizdegi alǵashqy ońaltý ortalyǵy ashylyp, jumys isteýde. Mekeme - oblystyq «Ana men balany aıalaý» ortalyǵynyń fılıaly. Onda barlyǵy 75 maman eńbek etedi.
Ortalyq 2,1 mlrd teńgege zamanaýı medıtsınalyq tehnıkamen jáne ońaltý quraldarymen jabdyqtalǵan. Búginge deıin barlyǵy 400-ge jýyq emdelýshi ońaltý kýrsynan ótse, onyń ishinde medıtsına qyzmetkerleri de bar.
«Munda naýqastarǵa tek ońaltý ǵana emes, psıhologııalyq kómek te kórsetiledi. Olardy tar beıindi mamandar tekseredi. Aýrýynyń jeńil nemese aýyrlyǵyna baılanysty olarǵa fızıoterapııa, kınezıterapııa, aerozol terapııasy taǵaıyndalady», - deıdi bas dáriger Dınara Káribaeva.
Jalpy, oblys boıynsha pandemııamen kúresý úshin 11,1 mıllıard teńge baǵyttalǵan. Atap aıtqanda, medıtsınalyq uıymdardy jabdyqtaýǵa 4,7 mlrd.teńge bólinip, 55 jedel járdem kóligi, 4 kompıýterlik tomografııa, 97 ókpeni jasandy jeldetý apparaty, 4 tsıfrlyq rentgen apparaty, 2 EKMO qurylǵysy (ekstrakorporaldy membrana ottegi), 100 kópfýnktsıonaldy jáne reanımatsııalyq kereýetter alynǵan. 4 aýrýhanada ottegi stantsııalary ornatyldy.
Sondaı-aq, Memleket basshysynyń tapsyrmasy aıasynda shalǵaı aýyldarǵa medıtsınalyq kómek kórsetý úshin respýblıkadan 8 «mobıldi emhana» bólingen.
KVI-men kúreske qatysqan 4 myńǵa jýyq medıtsınalyq qyzmetkerge 3,4 mıllıard teńge kóleminde syıaqy tólengen.
Taraz qalasyndaǵy perınataldyq ortalyq pen Rysqulov aýdanyndaǵy týberkýlezge qarsy dıspanserdiń ǵımaraty jóndelip, 350 oryndyq ınfektsııalyq aýrýhana bolyp qaıta jabdyqtaldy.
Oblystyq densaýlyq saqtaý basqarmasynyń málimetinshe, jalpy óńir boıynsha 4 530 orynǵa arnalǵan tósek qoryn, onyń ishinde 453 reanımatsııalyq tósek-oryn ashý josparlanǵan.
Pandemııamen kúreske 7 myńnan astam medıtsına qyzmetkeri tartylmaq.
Sonymen qatar, jas mamandardyń, medıtsınalyq joǵary oqý oryndarynyń stýdentteriniń arasynan, sondaı-aq S.D.Asfendııarov atyndaǵy Qazaq ulttyq medıtsınalyq ýnıversıtetimen memorandým aıasynda 280 dárigerden turatyn rezerv jasaqtalypty.
Biryńǵaı dıstrıbıýtorlarmen medıtsınalyq uıymdar 11,8 mlrd.teńgege dárilik zattarmen jáne medıtsınalyq buıymdarmen qamtamasyz etilgen.
Koronavırýsty emdeýge arnalǵan dári-dármekter men medıtsınalyq buıymdardyń eki aılyq qory qalyptastyrylǵan.
Epıdemııaǵa deıingi kezeńde 350 myńǵa jýyq adam nemese oblys turǵyndarynyń 30 paıyzy tumaýǵa qarsy ekpemen qamtylǵan.
