Tarazda koronavırýs juqtyrǵan adam anyqtaldy degen aqparat jalǵan – polıtsııa
TARAZ. QazAqparat – Áleýmettik jelide Taraz qalasynda koronavırýs anyqtalǵandyǵy týraly taraǵan aqparat jalǵan, - dep habarlaıdy QazAqparat.
Bul týraly Jambyl oblystyq polıtsııa departamentiniń baspasóz qyzmeti habarlady.
«WhatsApp» messendjerinde «Tarazǵa Máskeýden ushyp kelgen ushaqtaǵy áıelden koronavırýs tabyldy», sondaı-aq «Altynshy shaǵynaýdanda bir otbasynyń 6 balasymen karantınge qamap qoıypty» degen aqparattardyń shyndyqqa janaspaıtynyn habarlaımyz», delingen vedomstvo málimdemesinde.
Sondaı-aq, polıtsııa departamenti azamattardy jalǵan habarlamalardy taratpaýǵa jáne tek resmı aqparatqa senýge shaqyrdy.
«Jalǵan aqparatty, onyń ishinde áleýmettik jeliler men messendjerler arqyly taratqany úshin qylmystyq jaýapkershilik zańmen belgilengenin eskertemiz. QR Qylmystyq kodeksiniń 274-baby 2-bóligine sáıkes «Buqaralyq aqparat quraldary jáne aqparattyq-kommýnıkatsııalyq jeliler arqyly kórineý jalǵan aqparat taratý» úsh myń aılyq eseptik kórsetkishke deıingi mólsherde aıyppul salýǵa nemese sol mólsherde túzeý jumystaryna nemese 800 saǵatqa deıingi merzimge qoǵamdyq jumystarǵa tartýǵa bolmasa úsh jylǵa deıingi merzimge bas bostandyǵyn shekteýge, sondaı-aq, sol merzimge bas bostandyǵynan aıyrýǵa jazalanady»,-deıdi PD jazbasynda.
