Tarazda koronavırýs juqtyrǵan 4 adammen baılanysta bolǵandar anyqtalýda
NUR-SULTAN. QazAqparat – Búgin Taraz qalasynda koronavırýs ınfektsııasyn juqtyrǵan tórt adam anyqtaldy, dep habarlaıdy Memlekettik komıssııanyń shuǵyl shtaby.
Tórteýi de ózderine deıin vırýsty juqtyrǵan adamdarmen baılanysta bolǵan. Karantındik statsıonarǵa jatqyzylǵan kezde PTR zertteýge alynǵan analız nátıjesi olardyń koronavırýsty juqtyrǵanyn kórsetti.
Naýqastar juqpaly aýrýlar statsıonaryna jatqyzyldy. Olarmen baılanysta bolǵan adamdardy, vırýsty juqtyrý jaǵdaıyn anyqtaý jumystary júrgizilip jatyr. Aýrý oshaqtarynda epıdemııaǵa qarsy sharalar júrgizildi.
Óńirde 65 adamnyń koronavırýsty juqtyrǵany tirkelgen, olardyń ishinde: Taraz q. ‒ 15, Baızaq aýdany ‒ 3, Jambyl aýdany ‒ 4, Qordaı aýdany ‒ 33, Merki aýdany ‒ 2, Moıynqum jáne Shý aýdandarynda bir-bir adamnan anyqtalǵan. Delı ‒ Taraz reısiniń jolaýshylarynyń qatarynan ‒ 6 adam.
21 sáýirdegi jaǵdaı boıynsha 11 adam saýyǵyp shyqqan jáne qazirgi tańda dárigerlerdiń baqylaýynda úı karantıni rejımin saqtap otyr.
Juqpaly aýrýlar statsıonarynda 50 adam emdelip jatyr.
