Tarazda kópqabatty úıdegi órtten 171 adam qaýipsiz jerge kóshirildi
TARAZ. QazAqparat - Taraz qalasynyń «Qarasý 5» shaǵyn aýdanyndaǵy bes qabatty turǵyn úı órtendi, dep habarlaıdy QazAqparat.
Qazirgi tańda órtti tolyǵymen sóndirý jumystary júrgizilip jatyr. Bul týraly oblystyq Tótenshe jaǵdaılar departamentiniń baspasóz qyzmeti málim etti.
Habarlamada búgin keshki saǵat 19.30-da Taraz qalasy, «Qarasý 5» shaǵyn aýdanyndaǵy №18 úıdiń shatyrynda órt shyqqany aıtylǵan.
«Departamenttiń órt sóndirý jáne avarııalyq qutqarý jumystary qyzmetine 19.34-te qońyraý kelip tústi. Ony sóndirýge 14 tehnıka, 62 órt sóndirý qyzmetiniń mamany jumyldyryldy.
Qazirgi tańda 171 adam qaýipsiz jerge kóshirildi, onyń 42-i bala. Keshki saǵat 20.50-de órttiń ózge aımaqtarǵa qaýip tóndirýi toqtatylyp, qazirgi tańda tolyq baqylaýǵa alyndy», - delingen habarlamada.
Jergilikti atqarýshy organdar órt shyqqan úıdiń turǵyndaryn jaqyn mańdaǵy eki mektepke kóshirip, onda ystyq tamaqpen qamtamasyz etýde.
Búgingi tańda atalǵan oqıǵaǵa baılanysty jedel shtab toby qurylyp, tilsiz jaýdyń shyǵý sebepteri anyqtalýda.
