Tarazda kópqabatty úı órtenip, turǵyndar mektepke ornalastyryldy

TARAZ. QazAqparat – Tarazda kópqabatty turǵyn úı órtenip, 100-den astam adam evakýatsııalandy, dep habarlaıdy QazAqparat tilshisi.

Jambyl oblystyq Tótenshe jaǵdaılar departamenti baspasóz hatshysynyń habarlaýynsha, 16 sáýir kúni saǵat 3:55-te Taraz qalasyndaǵy Tóle bı kóshesi, 4 mekenjaıynda ornalasqan bes qabatty turǵyn úıdiń shatyrynan órt shyqty. Jalyn 800 sharshy metrdi, ıaǵnı ǵımarat shatyrynyń jalpy aýmaǵyn sharpydy.

Tótenshe jaǵdaılar departamenti qyzmetkerleriniń kúshimen turǵyn úıden 100 adam evakýatsııalandy. Onyń ishinde 60-y – bala. Órtti sóndirýge 13 tehnıka men 54 órt sóndirýshi jumyldyryldy.

Qala ákimi Baqytjan Orynbekovtiń tapsyrmasymen órtten zardap shekken turǵyndardy №10 mektepke ýaqytsha ornalastyrý jóninde sheshim qabyldandy. Órttiń shyǵý sebebi men shyǵynyn arnaıy qurylǵan komıssııa esepteıdi.

Aıta keteıik, buǵan deıin biz Tarazda bazar órtendi dep habarlaǵan bolatynbyz. «Aýyl-Bereke» bazarynda dońǵalaq satatyn dúńgirshekten órt shyǵyp, ony aýyzdyqtaýǵa 15 órt sóndirýshi men 5 tehnıka jumyldyrylǵan bolatyn.

Al, Astanada bir aptada 1,5 myń sharshy metr aýmaqta qurǵaq shóp pen qamys órtendi. Ótken jyly osyndaı 313 jaǵdaı tirkelgen edi. Orman jáne dala órtteriniń aldyn alý maqsatynda bıyl Astana aýmaǵynda tabıǵı órtke qarsy is-sharalar jospary ázirlendi. Qala shekarasynyń perımetrinde 6 baǵyt boıynsha jyljymaly kúzet beketteri uıymdastyryldy.

Sonymen qatar, Shyǵys Qazaqstan oblysynyń qutqarýshylary kún saıyn 10-nan astam dala órtin sóndirýge shyǵatynyn jazǵanbyz.