Tarazda kópqabatty turǵyn úı órtendi
TARAZ. QazAqparat – Taraz qalasynda bos turǵan kópqabatty turǵyn úı ǵımaraty órtendi, dep habarlaıdy QazAqparat tilshisi.
Jambyl oblysy Tótenshe jaǵdaılar departamentiniń jedel basqarý ortalyǵyna Taraz qalasy, Qapal kóshesiniń 4-shi burylysynda ornalasqan qaraýsyz ári bos turǵan ǵımarattyń órtengeni týraly habarlama kelip túsken. Oqıǵa ornyna Taraz qalalyq órtke qarsy qyzmet garnızonynyń kúshteri men quraldary jedel jetti.
«Birinshi bólimshe órt bolǵan alǵan aımaqqa shuǵyl jetti. Órt aýmaǵy 200 sharshy metrdi quraǵan. Órt sóndirýshiler 46 mınýt ishinde órtti sóndirdi. Zardap shekkender joq. Qazirgi ýaqytta órttiń shyǵý sebebi jáne keltirilgen materıaldyq zalaly anyqtalýda»,-delingen vedomstvo habarlamasynda.
Al óz kezeginde turǵyndar jaqyn mańdaǵy kólikterdi der kezinde ottan alys aýmaqqa kóshirip úlgergen kórshileri men órt sóndirýshi-qutqarýshylardyń kásibı sheberligi men jyldamdyǵyna rızashylyǵyn bildirip, alǵys aıtty.
Osyǵan baılanysty Jambyl oblysy TJD oblys jáne qala turǵyndarynan balalar men qarttardy úıde qaraýsyz qaldyrmaı, órt qaýipsizdigi erejelerin qatań saqtaý qajettigin eskertedi.
